WILLEMSTAD.- Sandals Resorts International (SRI), e kadena di hotèl number un na mundu pa loke ta e konsepto di ‘all-inclusive’, ayera a firma un akuerdo, ku ta enserá ku Sandals Resort lo establesé na un destinashon kompletamente nobo. For di ayera Santa Barbara Resort na Kòrsou a kombertí den Sandals Resort Curaçao.

Esaki lo bira e di dies isla den e region di Karibe kaminda e kadena di hotèl akí ta establesé su mes. Inisialmente, Sandals Curaçao lo ofresé 350 kamber i suites luhoso na e bahia di Spaanse Water i Laman Karibe. E renovashonnan lo ‘Sandalisá’ e propiedat, ku tabata yama Santa Barbara Beach & Golf Resort komo parti di un proyekto mas amplio di 3.000 hèktar, ku ta programá pa kuminsá den 2021.

Sandals Resort Curaçao lo bai ofresé e inovashonnan luhoso pa e isla, ku a bira sinónimo di e kadena di renombre mundial ku Sandals Resorts ta den e region. E plannan den konsepto pa e resort ta enserá e elementonan krusial ku ta karakterisá e eksperensia estilo Sandals. Pensa riba pisinanan grandi, un variedat di opshon di gastronomia mundial i kambernan espasioso, inkluso River Suites ku a konstruí resientemente segun e konsepto di luho Rondovals di Sandals.

Wéspetnan lo tin akseso tambe na e kancha di golf di kampionato Pete Dye (18-hole), dos marina propio i un espasio pa reuní paden i pafó di mas ku 3500 meter kuadrá –esun di mas grandi na Kòrsou.

E kultura vibrante, playanan bunita i kuebanan aventurero di Kòrsou, ta bon konosí, pero tambe e áreanan di buseo espektakular i un ekosistema supmarino eksótiko. Ku su temperatura promedio hinter aña di mas o ménos 26 grado Celsius, Kòrsou por broma di ta: e eskape semper perfekto’.