WILLEMSTAD.- E Sargassum Wier ku algun luna pasá a asotá kosta di Kòrsou, ta biniendo bèk. Nos a tuma nota na Ascención dia pa dia e ta birando pió.

Den wikènt tras di lomba Stichting Uniek Curaçao den kuadro di Cura DOET den kooperashon ku personal di kontrolaria general. Personal di inspekshon di enseñansa i fundashon Equine a kita e konsentrashon di Sargassum ku tabatin na playa di Charomba i tambe Ascención.

Por a nota un biaha mas ku e konsentrashon di e Sargassum tabata inmenso. I miéntras boluntarionan tabata saka Sargassum for di awa, nan tabata mira manera vèlt di Sargassum ta yega na kosta. Tabata manera un trabou ku no tin fin.

Ya por sinti e holó stinki ku e Sargassum ta mandando i tur kos ta indiká ku den dianan ku ta bini esaki lo bira pió.

Ku yudansa di loder e 30 boluntarionan a purba saka e Sargassum for di kosta. Pero segun Uniek Curaçao mester bin kontinuashon na e limpiesa aki.

Na e parti wèst a pone hopi atenshon na e Sargassum. Miéntras tantu segun Uniek Curaçao a drenta informashonnan di konsentrashon grandi di Sargassum ku a drenta na Patrick i Groot St Joris. Warda Kosta a mèldu e konsentrashon grandi aki na parti nort ost di Hato.

Na Ascención solamente e fenómeno aki ta krusial ya ku den por lo ménos 3 bario den serkania ta haña molèster di dje diariamente.

Ta spera ku e Sargassum den próksimo simannan lo bira muchu mas tantu. Uniek Curaçao ta hasi un yamada riba gobièrnu pa pone atenshon na e situashon.

...Riba e fotonan por tuma nota di parti di e trabounan di limpiesa den wikènt, pero tambe por mira foto di ayera di e kantidat di Sargassum na Ascención...