Asina ta chek si ‘aangifte’ di OB ta konfiabel!

WILLEMSTAD.-EXTRA a tuma nota di empleadonan di Stichting Belasting Accountants Bureau (SBAB) ta hasiendo trabounan di kontròl den toko. Direktor di SBAB sr. Sherwin Casper a konfirmá pa EXTRA ku e trabounan aki ta tumando lugá. Tambe el a splika ku promé ku un toko haña bishita di kontroladónan, SBAB ta hasi loke nan ta yama ‘waarneming ter plaatse’ durante 3 dia den un luna.

EXTRA mester indiká ku den pasado tambe SBAB tabata hasi e tipo di kontrol aki, despues ku a deskubrí kon sierto grupo di komersiante ta bende produkto pero no ta registrá esaki den kaha ofisial. Mas bien ta kobra i hasi kambio di plaka for di un ‘kaha di sigá’ i despues asta a bini ku algun kaha idéntiko na esun di SBAB. Kada momentu ku un komersiante aktua di e forma ei e ta perhudiká hinter komunidat di Kòrsou. Banda di esei e ta kompetensia inhustu kompará ku e negoshi ku si ta kumpli ku pago di belasting manera lei ta preskribí.

EXTRA  tuma nota ku e kontroladónan ta para den banda trankil i ta wak kiko kada hende ta kumpra pa wak kiko e komersiante ta registrá den e kaha komo benta. Den pasado komersiante ta registrá ku apénas e tin benta durante di hinter un luna, miéntras ku ora SBAB pone kontroladó fin di luna òf mei mei di luna, ta nota ku ta benta respetá ta tuma lugá. Asina por saka afó ku e loke sierto komersiante ta deklará no ta korekto.

Sr. Casper ta informá ku e kontrolnan ta tuma lugá na kuminsá di luna, mei mei di luna i tambe na final di luna. Di e forma ei por haña un bon bista kon e benta ta den sierto área. E trabounan di kontrol aki no a stòp nunka! Manera indiká anteriormente, promé ku un toko òf minimarket han̈a un kontrol ta chek e situashon durante 3 den luna.

E kontrol aki ta yuda pa han̈a un indikashon di e benta ku ta tuma luga den kada tienda i tambe e ta yuda den kontrol di “aangifte winstbelasting of inkomstenbelasting”. Pero tambe pa wak ku aangifte nan mensual di omzetbelasting ta konfiabel.