WILLEMSTAD - Pasaheronan ku ta salí di Schiphol no por pasa kontrol di seguridat ku bòter di bebe mas den nan ekipahe di man. E medida den pasado a keda relahá presisamente paso awor tin ekiponan di scan mas sofistiká disponibel. Komishon Europeo ke pa e reglanan bieu keda implementá bek. E portal di notisia di aviashon, luchtvaartnieuws.nl, a raportá di e desishon aki. Ku e yegada di scanner CT avansá, e reglanan na Schiphol a keda relahá. Pasaheronan por a pasa seguridat ku bòter di bebe i asina bai abordo di avion kuné. No tabatin ku kumpra un ko’i bebe karu na Schiphol òf den avion. Na Bèlgika ya a implementá e medida nobo aki for di ayera 1 di sèptèmber. “Esaki no ta nos eskoho pero di Komishon Europeo ku ke un standard internashonal”, asina bosero di Schiphol a bisa anteriormente. “E reglanan lo keda implementá tambe na otro aeropuertonan di Europeo.” Esaki ta nifiká ku 100 cc ta e kantidat maksimal di líkido ku por tin den un ekipahe di man. Segun Schiphol Group, e desishon aki no tin nada di aber ku un menasa (di teror) mas haltu.