WILLEMSTAD. – Riba ròl penal di djaweps 10 di mei, tin un petishon di parti di Gerrit Schotte i Charles Cooper pa trata artíkulo 43 di Kódigo di Prosedura Penal. Artíkulo 43 ta un huisio sumario penal pa atendé aspektonan ku no ta reglá den lei.
Artíkulo 43 ta un asina yamá “strafrechtelijk kort geding”, ku ta un artíkulo ku ta duna espasio na un sospechoso pa trata di hasi petishon riba aspektonan importante i urgente, pero ku no ta reglá den lei.
Den kasonan manera, ‘een rechterlijk vooziening bij dringend noodzaak’, pues mester tin un nesesidat urgente, ku no ta reglá den lei.
Esaki ta pone ku e tribunal mester tuma un desishon mas lihé posibel, teniendo na kuenta e urgensia ku e kaso tin.
E kaso aki ta keda tratá den Korte Superior kaminda ku tres hues lo studia e petishon hasí.
Manera ta konosí resientemente outoridatnan hudisial a inisiá un investigashon riba posibel soborno, esta ku lo mester tabatin pagamentu, o sea ofertanan hopi konkreto di hopi plaka pa parlamentarionan kita nan sosten for di koalishon i uni nan mes ku e grupo ku e momentu ei tabata den oposishon.
Un di e parlamentarionan den e kaso aki Yael Plet di Partido MAN lo a haña un di e ofertanan aki. Esaki por a keda derivá for di e keho ku el a entregá na Ministerio Públiko ku na nan turno a enkargá “Landsrecherche” ku e investigashon.
Investigando e keho, Landsrecherche a topa ku indikashonnan serio di soborno.
Segun komunikado di Ministerio Públiko tin un kaso ku tin indikashon fuerte di soborno ku no a logra, pero den un otro kaso si e soborno lo a keda kompletá.
Esaki a kondusí na entradanan hudisial den kas di Schotte i Cooper i na e momentunan aki e dos personanan aki ta keda señalá komo sospechoso.
Kiko ta e petishon ku ta mará na artíkulo 43 hasi pa keda tratá djaweps awor, no ta konosí.
Extra a buska kontakto ku abogado di Schotte i Cooper, pero esei a resultá enbano.
E kaso ta planiá pa djaweps awor na Korte, kaso lo wòrdu tratá porta será.