Presidente komisario aeropuerto St.Maarten a entrega retiro

PHILIPSBURG.- E anunsio di e presidente di hunta di komisario di Prensès Juliana airport na St.Maarten a sorprendé hopi hende riba e isla i tambe den reino. Alex Dijkhoffz a entrega su retiro na minister Stuart Johnson entrante fin di e luna aki. E motibu prinsipal ta ku e no ta di akuerdo ku tur miembro di e gerensia i tur miembro di e hunta di komisario di e kompania ku ta manehá e aeropuerto mester pasa un proseso di screening di integridat ku Ulanda a imponé.

Pa basta dia kaba tin bisá ku algun dirigente di e aeropuerto lo no ta muchu di akuerdo ku e kondishon severo ku Ulanda a pone riba St.Maarten. Ulanda ta eksigí un screening ku e organisashon National Security Service VDSM (loke nos konosé na Kòrsou komo VDC) lo mester hasi. E gerensia i e hunta di komisario mester hasi e petishon pa screening na VDSM prome ku 24 di aprel próksimo.

Komo kontra prestashon Ulanda di su banda lo pone un supsidio di 50 mion dòler na disposishon di St.Maarten pa renobashon di e aeropuerto. Tambe Ulanda lo nombra un persona di su konfiansa den e komisariado di e kompania ku ta manehá aeropuerto.

Manera ta konosí orkan Irma i Maria a kousa destrukshon sumamente grandi na e aeropuerto di St.Maarten. E aeropuerto huntu ku haf di St.Maarten ta e ardunan prinsipal pa ekonomia di e pais ku ta biba pa gran parti di entrada ku turismo ta generá. E gobièrnu di St.Maarten a lucha hopi pa evitá metementu di Ulanda den maneho di e aeropuerto, pero tempu ta bai i nan no por warda mas pa drecha e aeropuerto i asina krese bek den turismo.