WILLEMSTAD –Den kolaborashon ku Sektor di Kultura i Centro Cultural Curaçao, Sentro di Detenshon i Korekshon Kòrsou a partisipá konhuntamente na diferente aktividat, es desir personal i e detenidonan, ku ta detené den e instituto. Ta konosí ku gobièrnu di Kòrsou a deklará aña 2019 komo aña di piano i silinder, es desir aña di Kaha di Òrgel.

E meta di e proyekto aki tabata pa sirbi komo vehíkulo pa e detenidonan di SDKK siña i desaroyo posibel talentonan ku ainda no a wòrdu deskubrí, ku nan por sigui usa despues ku nan bandoná e instituto. SDKK ta suprayá e importansia pa fortifiká nos propio identidat i balornan propio, poniendo énfasis riba nos historia i kultura. Den kuadro di nos kultura SDKK, CCC huntu huntu ku Kas di Kultura, a brinda detenidonan di SDKK e oportunidat pa duna realse na nos “Ka’i Òrgel”.

Durante di e proyekto aki e detenidonan di SDKK, a risibí informashon, treinen, instrukshon, guia i material pa por yega na traha nan kaha di òrgel miniatura. Tambe mester bisa ku huntu ku CCC, SDKK a inisiá e proseso pa traha dos kaha di òrgel grandi.

Un total di 52 detenido a partisipá na e proyekto, dia kua por a kai den premio. Na luna di sèptèmber último, durante di e Siman di Kultura, CCC a organisá un eksposishon kaminda e 13 kaha di òrgelnan ku a kai den premio a wòrdu ekshibí na pueblo di Kòrsou.

Di mira kon e detenidonan a demostrá ku, usando material resiklá, es desir material ku a wòrdu tirá afó den SDKK, nan a transformá esakinan i duna nan un bida nobo. Manera  e detenidonan mes a ekspresá: “Nos tambe ta wòrdu transformá durante di nos detenshon pa siña skohe pa un bida nobo den kua nos ta hasi eskohonan positivo i salú. Dor di habri nos mes komo hende i aseptá e prosesonan di edukashon, formashon i siña traha huntu na un manera positivo, nos ta traha pa kambia nos komportashon pa unu mas responsabel”.

E liña kòrá den kuadro di e trayektonan di resosialisashon den SDKK ta unu masha simpel: “si di 10 kliente nos logra kambia 4 nos ta kontentu. Si nos logra inspirá 3 nos ta satisfecho. Si nos logra kambia unu no lo mester ta orguyoso. Paso e proseso ei lo ta un estímulo i ehèmpel pa otro detenidonan ku ta detené, pa nan tambe por kambia nan manera di pensa i aktua. Asina aki nos ke ampliá e efekto di ‘dominó’ kaminda SDKK ke siña e detenidonan pa yuda otro a base di nan akshonnan positivo”.

Un danki ta bai na tur kliente ku a partisipá, tur trahadó ku a hinka nan skouder bou di proyekto aki, tur siudadano ku a bishita e eksposishon na i sigur CCC ku a tabata habrí pa duna lo máksimo pa e proyekto aki por tabata un éksito rotundo.