Epidemiólogo dr. Gerstenbluth a bati bèl

WILLEMSTAD.- Sin ke trese pániko, epidemiólogo dr. Izzy Gerstenbluth a bati bèl ayera kaminda e ta teme ku si no tin komportashon responsabel awe di votadónan, ku elekshon lo bira un evento di plamamentu di COVID-19 riba nos isla.

Dr. Gerstenbluth a reuní ku prensa pa duna informashon dje situashon di e vírus riba nos isla i pa prensa konsientisá komunidat pa ta kouteloso awe na momentu di bai vota, sea responsabel.

E epidemiólogo ta hasi yamada dramátiko pa tur hende kuida awe durante di e proseso di votashon. Henter e asuntu aki no ta bai pa ta algu polítiko, i pa 40 aña i piku di su trabou semper el a duna informashon na serio, ta loke ku dr. Gerstenbluth a deklará ku un bos bastante preokupá.

Awor ku tin e variante di e vírus, e ta plama rápido.

Aktualmente hopi hende ku haña e vírus di Corona, no ta bira hopi malu. Sinembargo e grupo di riesgo si tin di tene kuenta pa esakinan no oumentá, drenta hospital i tambe den departamento di Kuido Intensivo ku tur konsekuensia ku esaki por trese kuné.

P’esei un supliká na tur hende pa keda leu for di grupo di hende, tur hende tene nan mes na regla di COVID-19, spesialmente riba dia di awe.

E peliger grandi ta ku un hende ku mester ta den karentena pasobra e tabatin kontakto ku hende ku ta infektá ku Corona vírus òf e tin e vírus, ta sali bai vota. E mensahe ta pa tur hende ku ta den karentena i/òf infektá pa keda nan kas. Si tòg ke bai vota, dr. Gerstenbluth ta pidi e hendenan aki pa bisti mondkapje, bai vota i bai bo kas. No bai aglomerá na sede òf otro kaminda. Bai kas!. Hasta si e hendenan aki tene nan mes na regla, nan lo por pega otronan tòg. P’esei e konseho di bai kas.

Debí na e kasonan ku a oumentá último dianan, GGD ta kayendo atras pa yama tur e hendenan di kontakto i hasta esnan positivo, esta infektá ku e vírus, pasobra tin biaha nan no ta kue telefòn di GGD.

Na e momentu aki tin 848 hende ku ta den karentena dor ku nan tabatin kontakto ku hendenan infektá. Banda di esei tin mas di 200 hende ku ta infektá ku GGD no a logra di haña na telefòn pa informá nan di nan resultado positivo. Pues un kalkulo ta indiká ku lo mester tin 1200 hende ku mester ta den karentena, esta na kas. E kantidat aki, banda di esnan ku ta aktivo aktualmente, tin un kantidat signifikante di alrededor di 2500 hende ku mester ta den karentena.

Mas aleu dr. Gerstenbluth a bisa di a papia ku lidernan di partidonan polítiko, kaminda a pidi nan pa no organisá nada na sede. Solamente 25 hende, pero hasta e 25 hendenan dr. Gerstenbluth ta haña hopi.

Si e kantidat di kasonan sigui subi, por bin ku medidanan mas pisá.