WILLEMSTAD - Djasabra 27 di yüli pa 17:35 e Sentro di Reskate di Wardakosta( RCC) a risibí informashon ku tin un barku di provishon, MISS DEBBIE, den problema anto ku nan tin mester di ayudo.  Na e momento ei e barku tabata na 215 mia nortwèst di Aruba i tabata senk. E barku tabata na kaminda pa Aruba unda e tripulante lo a bai entregá e barku na su doño nobo. Mes ora a lansa e avion Dash 8 di Wardakosta pa bai lokalisá e barku ku e tres tripulante ku tabata a bordo. Mientrastantu e Sentro di Reskate di Wardakosta a manda un notifikashon na tur barku den bisindario pa duna asistensia. HARUNA EXPRESS i e barku krusero SEA PRINCESS, ku tabata na kaminda pa Kòrsou, tabata den bisindario. Haruna Express no a logra pa reskatá e personanan dor di laman brutu. E barku krusero si a logra di saka un boto salbabida i a buska e tres hende hòmber ku nan a bin topa den un boto di salbabida ya ku nan barku mes a senk. Tur tres persona ta di nashonalidat Merikano. Na yegada di SEA PRINCESS na Kòrsou a entregá e tres hòmber na outoridat.