WILLEMSTAD.- Konseho di Minister lo mester tuma un desishon awe riba paga di e debe ku tin na ámtenarnan for di 2019 na pago di “loontrede”, lumpsum i indeksashon di salario. E sindikatonan a pone un ultimatem pa haña un kontesta mas tarda awe di gobièrnu pa sa kiko ta bai bai i ki dia ta hasi pago.

Minister di Finansa, Javier Silvania  den un proposishon ku el a manda pa Konseho di Minister tuma desishon riba dje ta indiká ku tin 32 mion florin pa paga sea “loontrede” i lumpsum òf indeksashon di salario. Siman pasá minister di BPD, Ornelio ‘Kid’ Martina a proponé pa paga e debe di 2019 ful ku ta un montante di 68 mion.

E desishon final mester kai awe den Konseho di Minister i ta mustra di ta un bataya di poder entre e dos ministernan. Mientrastantu sindikatonan ta pendiente e kontesta di Konseho di Minister pa fiha posishon.

Pago di e ámtenarnan en todo kaso lo no por tuma lugá promé ku minister Martina haña e konsehonan relevante di su departamento di rekurso humano, di direktorado di asuntunan hurídiko i fondo di penshun di APC, e proposishon di Silvania ta indiká mas aleu. Esaki ku tur probabilidat lo enserá ku e pago por tuma lugá te na desèmber i ku e lo ta un “voorschot” riba e debe total di gobièrnu na e ámtenarnan te dia ku logra paga esaki ful.