WILLEMSTAD.-  Abogadonan Mirto Murray i Karan Doekhi ta lamentá ku organisashon idealista Animal Rights ta hasi uso di argumentonan no korekto, asina Murray a bisa EXTRA. Manera ta konosí djaweps mainta wes na Kòrsou a trata kaso ku Animal Rights a entamá kontra Sea Aquarium, ku ta kai bou di organisashon Tursiops. Wes lo duna sentensia den seis siman.

Dia 7 di sèptèmber korte a trata e petishon di Animal Rights pa retirá òf destruí tur pèrmit. Intenshon di e organisashon Animal Rights ta pa wes disidí ku Curaçao Sea Aquarium no tabatin derechi pa transportá e dòlfeinnan. Komo konsekuensia e kuater dòlfeinnan mester bin bèk Kòrsou.

Anna Krijger di Animal Rights ta bisa ku kondishonnan di dòlfeinnan na Arabia-Saudita ta hopi malu. Tambe e ta bisa ku dòlfein Mosa fin di ougùstùs a kometé suisidio pa motibu di kondishonnan malu. E ta teme pa bida di e otro kuater dòlfeinnan ku a bin fo’i Kòrsou.

Murray ta splika ku hopi kos ku Animal Rights a bisa den korte no ta korekto. ‘‘Animal Rights ta bisa ku e dòlfeinnan, ku ta keda den Aquarium Fakieh ta míles di kilometer for di laman. Esaki no ta korekto, nan ta basta serka ‘Laman Kòrá’ (‘Rode Zee’). Tambe Animal Rights ke krea e impreshon ku e dòlfeinnan ta keda den un pool chikí den awa di kloro. No ta bèrdat.’’ Murray ta enfatisá ku Aquarium Fakieh ta bou di guia di un organisashon oropeo ku tin hopi eksperensia ku dòlfeinnan.

Murray tambe ta splika ku segun Animal Rights Mosa a kometé suisidio, pero hopi eksperto internashonal a splika ku no tin niun prueba pa e ponensia enkuestion. ‘‘Tur hende por mira e video di e último minütnan di su bida. Segun nos e ponensia ku Mosa a kometé suisidio no ta basá riba echonan. Animal Rights ke influensiá pueblo ku su ponensianan.’’

Abogado Karan Doekhi ta splika wes ku ta trata e kaso ta un wes di LAR, mihó konosí komo ‘bestuursrechter’. ‘‘Su trabou ta pa kontrolá e trayekto ku a yega na e dunamentu di pèrmit. E èks-doño a haña pèrmit pa bende i transportá e dòlfeinnan na Arabia-Saudita. Wes tin ku kontrolá si tur kos ku a tuma lugá, a bai segun reglanan di e tratado relevante. Den e tratado ta skirbi presis a base di kua kondishonnan un kompania por haña pèrmit pa transportá dòlfeinnan, ku ta un espesie di bestia menasá.’’ Wes tin ku disidí si gobièrnu di Kòrsou a sigui e trayekto pa duna pèrmit na un manera korekto, i si tur kos a pasa segun lei.

Doekhi ta splika ku wes no tin ku bisa algu tokante alokashon nobo di e dòlfeinnan. ‘‘Wes tin ku kontrolá e desishon pa duna pèrmit. Alokashon nobo no ta importante den e kaso aki.’’

Doekhi ta splika ku minister solamente por duna pèrmit si transporte no tin konsekuensia negativo pa sobrebibensia di e espesie di animal. Ku segun e tim di abogado di Sea Aquarium no ta e kaso.