Polis di St. Maarten a deskubrí un kantidat importante di bara di oro den un avion priva prosedente for di Venezuela. E baranan a keda konfiská djadumingu último na aeropuerto Juliana. Segun e agensia di prensa AFP, e piloto, ko-polito i vários otro persona sospecha di labamentu di plaka a keda interogá. E investigashon ta kontinuá pero nan no kier a bai den mas detaye. Durante un kontrol efektuá dia 14 di yüli último, duana i Alpha Team, polis di St. Maarten a logra deskubrí e baranan di oro. Ta ayera numa polis di St. Maarten a konfirmá e notisia aki pa AFP. E dokumentonan di e oro no tabata regla i tantu e baranan komo e avion a keda konfiská.