WILLEMSTAD.- Durante tratamentu di e kaso ku a keda yamá “Dorp”, e akusado Danilo Merced (34) a bisa ku e no ta esun ku a asesiná Michael Mercera alias “ Kòrsou Grandi” i Jurensly Martona dia 8 di aprel 2018. El a splika ku e dia ei, el a bai St. Cruz na altura di ‘Snek di Mau’, pa bai ranka bròmer. Despues ku su tayer a bira keshi el a bai para kantu.
E tabata pará un banda di e kaya i Jandre ku ta esun ku supuestamente lo a tira e víktima, tabata pará otro banda di e kaya.
Mas aleu e akusado a sigui konta, ora ku nan tabata pará einan, un outo a kore bin riba nan i hera di basha su bròmer abou. E shofùr ku a resultá di tabata “Kòrsou Grandi “, a bula abou i el a bai reklam’é na e toko ku el a hera di basha su bròmer abou.
Segun e akusado, nan a kuminsá bati boka ku otro, pero un gai a bin para nan i bis’é ku e gainan ei ta di Bándabou i ku nan ta gainan brutu. Despues el a bai para bèk na su bròmer i bandoná e sitio. Segun e akusado, el a bai kas i despues di 20 pa 30 minüt, Jandre a bin serka dje.
Ora el a drenta sinta den su outo, Jandre a kuminsá bis’é ku e ku “Kòrsou Grandi” tabatin un problema masha dia di un hòrtamentu di cheiba i ku e tabata slùip e víktima ratu kaba. El a bis’é ku tabata nèt bon ku el a kue diskushon kuné i pa nan harma un kos pa likid’é.
Merced a bisa, ku el a ninga e lokual ku Jandre a pidié, pa partisipá den e likidashon. Segun Merced, el a splika Jandre ku su kasá ta na barika i no ke tin problema. El a bisa ku Jandre a kuminsá yam’é homo i insult’é.
E na su turno a baha fo’i outo, laga su telefòn atras sin sa i esei tabata e fayo di mas grandi ku el a kometé, pasó ta pa e motibu ei e ta den problema aworakí relashoná ku e kaso. Siguiente dia el a haña su telefòn bèk serka Jandre.
Segun Merced, esun mes ku a tira ku ta Jandre, a keda likidá algun luna despues na altura di e bar di Flor de Noruega.
Pa hues e deklarashon di Merced ta asombroso. Ta promé bes ku e ta menshoná e nòmber di un tal Jandre den e kaso aki. Nunka promé esaki a sosodé.