...Guia di e enkuesta sra. Dainadira Eustatius-Martis...

WILLEMSTAD.- Alrededor di 45,6% di persona ta karga ekonomia di Kòrsou, pues esnan ku ta traha i ta paga prima i otro “belasting” nan, ta loke a resultá for di Enkuesta di Forsa Laboral ku Ofisina di Statistik (CBS) a realisá. E enkuesta a ser hasí di dia 10 òktober 2020 pa 1e novèmber 2020.
Segun Guia di e enkuesta sra. Dainadira Eustatius-Martis a splika ku e total di personanan empleá a baha di 61,547 persona na 2019 te 57,050 persona na aña 2020. E bahada di kasi 4,500 persona ta e resultado di oferta i demanda riba e merkado laboral. E sifra aki ta duna e bista real di e impakto ku e desaroyonan ekonómiko riba nos isla, inkluyendo desaroyonan a konsekuensia di COVID-19, tabatin entre òktober 2019 i òktober 2020.
Den e enkuesta ta wak kuantu persona ta traha ta buska trabou i tambe ekonómikamente inaktivo. E personanan ku aktivamente ta buska trabou den 2019 tabata 12,992 i a subi bira 13,442, i esaki a subi ku meramente 450 persona. Segun definishon internashonal si un hende indiká ku luna pasá e no a buska trabou aktivamente, e no ta kai den esnan ku ta kalifiká komo esnan ku ta buska trabou. E ta kai den e grupo di ekonómikamente inaktivo, kual t’esnan ku no ta traha ni ta buska trabou. ku esaki, sra. Eustatius-Martis, ta pidi pa por fabor pa no enfoká riba sifra di desempleo, pero enfoká riba desaroyo di esnan ku ta empleá. Pasobra esaki ta duna realmente kiko ta pasando riba nos merkado laboral. E kantidat di hendenan ku tabata inaktivo den 2019 kompará ku 2020 respektivamente ta 49,715 pa 54,562.
Den porshonnan di hende for di 15 aña ku ta traha: por diskutí ku un mucha di 15 aña no mester ta riba merkado laboral, mester ta na skol, un hende di 65 aña bai ariba tin derecho di penshonado, pero ta mara na e definishon internashonal kaminda no ta tur kaminda un mucha di 15 aña ta na skol òf un hende di 65 ta penshonado.
E porsentahe di tur hende ku ta traha a baha, di 59.7% na 2019 pa 56,4% na 2020, esnan ku ta ofresé di ke traha tabata 49,3% i a baha na 45,6%. E 45,6% ta tur e personanan ku ta bisa ta karga e ekonomia di Kòrsou. Ta nan ta aportá na primanan sosial. Esaki ta lòs for di otro personanan ku tin entrada i ta koperá ku kaha di gobièrnu i primanan. 45% di tur hende for di 15 aña bai ariba t’esnan ku ta laborá. Esnan ku ta buskando trabou, ta yega na 10,4% na 2019 pa 10,7%.
Na momentu ku mira sifra di desempleo segun definishon internashonal kompará ku tur esnan ku ta ofresé nan mes riba merkado laboral, esei a subi di 17,4% pa 19,1%, sra. Eustatius-Martis a splika.