WILLEMSTAD.- E echo ku tin biaha ta papia di sifra haltu di desempleo bou di hóbennan, esaki ta eróneo. 66% di tur hóben di 15 aña pa 24 aña ta studiando i ta bayendo skol. Esaki ta loke ku sra. Dainadira Eustatius-Martis lider di proyekto di Enkuesta di Forsa laboral 2020, di Ofisina Sentral di Statistik (CBS) a duna di konosé na prensa.
CBS a presentá sifranan preliminar di e enkuesta aki ku a ser hasi, kaminda a hasi komparashon di sifranan di 2019 pa 2020.
Pa loke ta trata hóbennan ku ta laborá di 15 aña pa 24 aña a baha di 4,121 den 2019 pa 2,902 na 2020. Un bahada basta konsiderabel. Si mira e kantidat di hóbennan ku aktivamente ta buska trabou tambe a baha di 2952 na 2019 pa 2119 na 2020. Esnan ku ta ekonómikamente inaktivo esta nan no ta laborá ni ta buskando trabou aktivamente, esaki a subi di 10,193 na 2019 pa 11,658 na 2020.
Ora wak e mesun porshon di henter poblashon, e hóbennan di 15 pa 24 aña, 30% ta ofresé nan mes riba merkado laboral den 2020. Esnan ku ta traha ta 17,4% i 12,7% di tur hóbennan den e kategoria di edat menshoná ku a kalifiká segun definishon internashonal di ta aktivamente buskando trabou. E porsentahe di desempleo na 2020 a yega na 42,2% kompará ku 41,7%.
Sra. Dainadira Eustatius-Martis a splika ku e 42,2% No ta nifiká ku te kantidat aki di hóbennan ta desempleá. Esaki ta kompletamente eróneo.
Ora wak datosnan di hóbennan di 15 pa 24 aña, ta mira ku un gran parti ta studiando. Di tur hóbennan di 15 pa 24 aña, 66% ta esnan ku ta studiando i ta na skol. Nan ta hasi estudio sea den dia, anochi òf kurso online full time.
Hopi biaha ta preokupá pa hóbennan ku ta buskando trabou, pero ora ku analisá e sifranan, hóbennan ku ta buskando trabou ta 2119 hóben di kual 30% bon mira ta studiando i nan ke un trabou sea pa yuda na kas òf paga estudio. Tin un kantidat di hóbennan ku no ta bai skol, pero ta buska trabou kual ta 8,1% di e poblashon di 15 pa 24 aña.
E hóbennan ku no ta studia ni ta traha i no ta buskando trabou ta 9,4%. E motibu dikon nan no ta bai skol, no ta buska trabou òf no ta trahando, CBS no sa. Esaki te grupo di hóben ku mester ta preokupá pe ta e grupo di hóben ku no ta studia ni ta buskando trabou.