WILLEMSTAD.- Ayera durante di e seremonia kaminda koleganan a rindi tributo na e víktima ku a pèrdè su bida djasabra último riba Moonchiweg, famianan tambe a ekspresá e doló inmenso ku nan a keda atras kuné. Durante di e insidente djasabra último mainta tempran, e víktima tabata kanando ta bai su trabou.

Famianan a indiká ku kasi pa yega e lusnan di tráfiko e shofùr ku tabata koriendo hopi duru a dal e víktima i lag’é algun meter leu bentá. E shofùr aki ta hende di bario i ta konosí komo un hende ku ta kore duru i iresponsabel segun famianan a indiká. Nèt na e sitio kaminda e choke a tuma lugá tin e “kusinchinan” di kaya (drèmpel) ku a keda poné.

Pero outomobilistanan no ta respetá esaki.

Riba dia di e insidente famianan a mira den e video kon e shofùr a pasa e kusinchinan ku velosidat haltu manera kos ku no tin nada mei mei di kaminda.

Tambe famianan a splika dikon e víktima tabata kana na man drechi di kaminda, pues ku lomba pa tráfiko. E famianan a indiká ku e otro banda di kaminda ta yená ku tur tipo di mata pues ya pa hopi tempu e instansianan nesesario no ta laga limpia e otro banda di kaminda pa asina peaton por kana di un forma responsabel.

Situashon di e lusnan di tráfiko tambe ta laga hopi di deseá. Ta un banda di kaya so tin lus. I e lusnan ku ta fushoná ta dòf dòf pues kasi no tin iluminashon riba e kaminda aki.

Famianan a indiká ku aktuashon iresponsabel di e shofùr a pone ku e víktima a keda kruelmente ranka for di e mundu aki lagando un yu di 3 aña atras.

Famianan lo no bai sinta ketu i lo buska hustisia pa morto di nan ser kerí.

Di parti di EXTRA palabranan di forsa ta bai na famia i konosínan di e víktima ku a keda atras.

...E sitio kaminda e shofùr a dal e víktima i bai lag’é algun meter leu bentá...

...E lado kual un peaton lo mester kana si e ta bai direkshon di e lusnan di tráfiko ta yená na mata...

...Kusinchinan di kaya kual e shofùr a pasa riba velosidat haltu...