WILLEMSTAD.- E kantidat di siudadanonan preokupá pa loke a sosodé den kaso di e festival di Ponton ku a keda kanselá na último ora, ta oumentando. Mas i mas e bosnan ta lantando pa buska manera pa bati na porta di hustisia pa regla kuenta ku e promotor enkuestion. Den pasado tabata asina ku un promotor ku a dal daks na mas ku un okashon ta bai riba un lista pretu di manera ku durante di un periodo di sinku (5) ano e no por hasi petishon pa niun evento grandi. Mester bin reglanan mas estrikto, asina Feco Gomes presidente di asosiashon di músiko a opiná na EXTRA.

Despues di hopi espektativa a kanselá e Ponton Festival. Loke ta lagando un smak hopi malu atras ta ku esnan ku a kumpra nan karchi no ta hañando nan sèn bek i pa kolmo tin informashon ku e promotor lo a bandoná Kòrsou entretantu. Apesar ku e promotor a saka un informashon den prensa ku lo bai duna tur hende nan sèn bek, e preokupashon a lanta hopi despues ku a bira konosí ku esaki no tabata e promé kaso i pa kolmo el a bandoná Kòrsou.

E tipo di kasonan aki por bai influensia otro promotornan ku si ta mihó prepará pa realisá un evento grandi asina. E echo ku klientenan no ta hañando nan sèn bek pa un evento di basta dia pasa por pone ku hendenan lo bai pensa muchu mas tantu promé ku kumpra karchi delantá pa un evento. Un promotor mester tin por lo ménos 40-50% di e kosto di e proyekto den su man. No por stens riba benta di karchi so, segun Gomes.