Riba ret sosial ta bisto ku ta baha duru riba aktonan di inmoralidat

WILLEMSTAD.-  Ayera fiskal Dennaoui-Simon durante tratamentu di e kaso di inmoralidat entre un tata di kriansa i su yu muhé menor, a bisa ku e tipo di kasonan asin’aki hopi hende ta baha pisá riba ora ku e wòrdu tres’é den prensa.

Segun fiskal e punto ta ku mester keda leu for di menornan di edat i no kometé niun tipo di akto di inmoralidat kontra nan. Punto!

Fiskal a sigui trese dilanti ku esei por a mira klaramente riba retnan sosial na e reakshonnan.

El a bisa ku kasonan di korte penal ta públiko i media ta sita tur loke ta pasa den sala, pa tin transparensia  i pa pueblo eifó sa kiko ta pasa durante kasonan ku ta bin den komunidat.

Segun fiskal hustisia ke duna  sea e víktimanan i òf e famianan ku ta sufri di abuzo di inmoralidat, pa nan no keda ketu ora konstatá tipo di aktonan asin’aki .

Den e kaso aki e víktima a bai Hulanda, pero e ke pa e sa ku no ta su falta loke a pasa, sino falta di e akusado ku a pone ku e mester a bai.

Fiskal a bisa ku e ke pa e víktima  haña forsa pa por sigui i keda ku su kabes na laira.

Pa loke ta e mama tambe fiskal a bisa ku nan ke dun’é forsa pa motibu ku e mester a enfrentá kosnan hopi doloroso i difísil.

P’esei e ke pa mamanan ta mas mente i wowo habrí pa ku nan yunan.

Pa lokual ta media, fiskal a bisa ku e reakshonnan tabata hopi fuerte pa ku e kaso aki apesar ku mester protehá e famia i mas bien e kriatura.