segun FMA

WILLEMSTAD. – “Ora nos ta duna ‘voorlichting’ na skolnan, nos ta ripará ku muchanan for di 11, 12 i 13  aña ta eksperensiá ku diferente supstansia, manera sigaria, alkohòl i ‘vape’. Nos ta asombrá kon yòn nan ta bisa eksperensia kuné. Pa e motibu nos ta organisá un simposio  fin di sèptèmber pa profeshonalnan i dosentenan.” Asina Daniëlla Pengel di FMA (Fundashon di Maneho di Adikshon) ta splika EXTRA. Dia 22 i 23 di sèptèmber FMA ta organisá un simposio ‘Kurioso pero kuidadoso’.

“Ku e simposio nos ke ekipá e hendenan ku ta traha ku hóben. Hóben tin un kuriosidat, ku no ta algu malu. Nos ke yuda e profeshonalnan kon por yuda e hóben pa usa e kuriosidat mas kuidadoso ku ta posibel.”

Segun Pengel e edat di 11 aña ta hopi yòn pa kuminsá eksperensia ku supstansia. “Esaki ta inkreibel, pero bèrdat. Kada bia ku nos ta bai skolnan i papia ku muchanan nos ta asombrá. E ta alarmante pa nos mes tambe. Ku e simposio nos ke sòru ku informashon ta yega serka nan. I pa e adultonan ta importante kon nan por sòru ku e kombersashon ta keda habri ku e muchanan.”

Segun Pengel hopi bia hóbennan tin pregunta. “Ta bon si nan ta sinta nan mes konfortabel pa aserka dosentenan ku nan pregunta. Tambe tin bia ku e muchanan ta na altura di kosnan positivo so, relashoná ku supstansia ku nan ta usa òf ku nan ke usa. Ta importante ku profeshonalnan i dosentenan ta informá e muchanan tambe tokante e aspekto negativo.”

Segun FMA falta di konosementu tokante supstansianan i nan efekto ta un di e faktornan prinsipal ku ta hasi e hóben mas vulnerabel pa desaroyá un adikshon òf yega na un fase problemátiko.

Segun e fundashon ‘ta bon pa un hóben tin mas faktornan di protekshon ku ta posibel pa asina eksperensiá un mihó balansa den su bida. Esaki por kontribuí na evitá ku nos hóbennan ta kai òf keda pegá den komportashon di rísiko.’ Pa mas informashon tokante e simposio i pa inskripshon por subi wèpsait di FMA: https://fma-curacao.com/konferensia-2023.