WILLEMSTAD.- Hotèlnan  na Kòrsou tabatin un okupashon di 70.7% den aña 2022, ku ta 10% mihó ku e averahe regional. Segun James Hepple, direktor interino nobo di Chata, esaki ta bon notisia pa nos isla. Pero Hepple ta splika na mesun momento ku te ainda tarifa pa kamber pa hotèlnan na Kòrsou ta relativamente abou.

Durante e aña 2022 e ‘average daily room rate’, e preis promedio ku hende tin ku paga pa un kamber di hotèl na Kòrsou tabata 206.32 US dòler, ku ta 29 porshento ménos ku e preis promedio di henter Karibe: ku ta 290.60 US dòler.

E sifra lokal ta basá riba 14 hotèlnan na Kòrsou, ku ta representá 2,543 kamber di hotèl, ku ta 52 porshento di tur kambernan di hotèl na Kòrsou. E promedio di Karibe, sifra regional, ta basa riba un total di 293 hotèlnan den Karibe.

Hepple ta splika ku ‘ta hopi interesante pa realisá kiko ta pasando na Kòrsou i kiko ta pasando den henter region di Karibe. Si bo ta kompará e sifranan ku otro isla, bo ta realisá ku 70.7% ta relativamente haltu’, segun Hepple. Kòrsou tin un promedio di kasi 71 %, pero Bahamas tin 61%, Barbados 63%, Belize 43%, Bermuda 53% i Santo Domingo 65%. “Cancún ta riba e mesun nivel ku Kòrsou, ku ta un promedio di okupashon di kambernan di hotèl di 71%. Pero mayoria destinashon tin sifranan hopi mas abou.”

Relashoná ku preis pa kambernan di hotel, tin hopi tarifa relativemente haltu den Karibe. E destinashon ku tin promedio di kambernan di hotel mas haltu ta e islanan di Turks & Caicos, ku tin un promedio di preisnan di kamber di hotèl di mas ku 1200 US dòler pa anochi. “Esaki ta un tarifa hopi haltu. Banda di esei tin destinashon manera Cayman Islands, US Virgin Islands i St. Lucia. E islanan ei tin hopi ‘high end, boutique hotelnan’, hende ta paga promedio entre 500 i 600 US dòler pa anochi. Kòrsou ta hopi abou di esaki.” Segun Hepple esaki ta konosí pa basta tempu kaba, i tambe a keda menshoná komo reto pa kambia. Segun Hepple awor ta un bon momento pa oumentá e preisnan di kambernan di hotèl “E demanda ta grandi. Nos reto ta pa hende ku ta bishita Kòrsou lo gasta mas plaka, entre otro pa nan kamber di hotèl. Awor ta un bon momento pa oumentá esaki.” Hepple ta splika ku den e aña 2023 mas hotèl lo habri nan porta na Kòrsou, manera Marriott Courtyard na Rif I e hotèl nobo di Corendon. “Nos lo sigui traha duru pa sòru ku mas hende lo bishita Kòrsou.”