WILLEMSTAD.- Minister di Tráfiko, Transporte i Planifikashon Urbano Charles Cooper djaweps último durante konferensia di prensa a splika ku ‘den 2013 José Jardim komo minister di Finansa a tuma un desishon ku te awe ta perhudiká nos tur, henter komunidat.’ Cooper a splika ku e desishon ta pa tapa buraku den presupuesto di pais Kòrsou. Cooper ta splika ku anualmente e montante total di tur hende ku ta paga nan number di outo ta mas o ménos 40 mion. “Jardim a disidí pa usa e montante pa tapa buraku di presupuesto di pais Kòrsou, pa asina Kòrsou tin un presupuesto balansá. Konsekuensia di esei ta ku aña tras aña despues di 2013 e aksènt a bai pa no usa e sèn ei pa tapa buraku di kaya i asfaltá kamindanan i tur lokual ku ta infrastruktura. Si no e sèn te ainda ta bai pa tapa buraku finansiero den presupuesto di pais.” Segun Cooper gabinete-Pisas a bisa ku nos no ke sigui riba e ruta ei. E minister di VVRP ta splika ku pais awor ta haña mas entrada, pa motibu ku ‘compliance’ a subi. “Tin mas kontròl. Esun ku tin ku paga ta paga. Esaki ta nifiká ku situashon finansiero di pais ta drechando. Poko poko nos ke  usa e sèn ku e pueblo ta paga pa su number di outo, pa nos infrastruktura.” Segun Cooper esaki tambe ta algu ku pueblo ke. “Hende ke ku e sèn ku nan ta paga, ta wòrdu usá pa drecha infrastruktura, pa drecha kaya. I nan tin rason ku esei.”

Cooper ta splika ku gabinete-Pisas a keda konfrontá ku un debakel ku 80% di nos kareteranan ta defisiente. “Pa un desishon deskabeyá di un gobièrnu den 2013 a tuma.”

Cooper ta splika ku promé ku 2013 ‘motorrijtuigenbelasting’ a wòrdu usá pa drecha kaminda. “Nos ke ku e sèn ta wòrdu usá pa infrastruktura atrobe. Pero esaki lo no bai fásil. Pasobra si aworakí nos kue e 40 mion i hinka den kaminda, konsekuensia ta ku nos lo no tin presupuesto balansá mas. Ku esaki nos lo violá Rijkswet Financieel Toezicht i por haña instrukshon (‘aanwijzing’).” Pa e motibu Cooper ta splika ku lo tuma algun tempu promé ku gobièrnu por usa tur e 40 mion di motorrijtuigenbelasting pa infrastruktura atrobe.