WILLEMSTAD.- Rei Willem-Alexander ta di opinion ku awor ta e momento pa yega na un akuerdo ku nos historia. Esaki Willem-Alexander a bisa prensa hulandes djabièrnè 30 di yüni despues di un seshon di portrèt pa fotógrafo hulandes di Willem-Alexander i su famia. Segun Rei Willem-Alexander ta hopi importante pa yega na un akuerdo. Manera ta konosí den henter Reino Hulandes lo konmemorá dia 1e di yüli 2023 ku den aña 1863 Hulanda a abolí sklabitut. Rei di Hulanda riba e dia ei lo duna un diskurso na Amsterdam den Oosterpark. Durante seremonia na tur seis isla di parti Karibense di Hulanda, i tambe na Sürnam, lo tin atenshon pa e diskurso na Hulanda.

Durante e ‘Programa Dia promé di yüli 2023’ na Kòrsou, ku lo tuma lugá na Brionplein, entre 8.27 or i 8.37 or di mainta ta planiá pa sigui e diskurso di Rei Willem-Alexander. Despues lo tin un rekuento di e diskurso na Papiamentu. Despues di e diskurso di Rei lo tin diskurso riba Brionplein di minister di Salubridat Públiko, Bienestar i Deporte di Hulanda, sr. Ernst Kuipers, siguí dor di un rekuento na Papiamentu. Mas aleu minister di Enseñansa, Siensia, Kultura i Deporte sr. Sithree van Heydoorn lo duna un diskurso i tambe minister-presidente di Kòrsou Gilmar ‘Pik’ Pisas. Durante e programa ‘Dia promé di yüli 2023’ lo tin un marcha di emansipashon i un baile di emansipashon i lo tin entrega di stampia nobo dediká na e dia ei, ku ta Dia di Emansipashon. Dia 1e di yüli 2023 ta marka un komienso di un aña di konmemorashon di tur e partinan di sklabitut. E aña di konmemorashon lo sera 1e di yüni 2024.

Willem-Alexander na Hulanda a bisa ku na su opinion ‘muchanan awendia ta siña hopi na skol tokante nos pasado kolonial i tambe tokante pasado di katibu’. Na su opinion e generashon di awor ta sinti e nesesidat pa yega na un akuerdo ku nos historia. Esaki ta algu importante pa e siguiente generashonnan tambe. Esaki ta nifiká, segun Rei, ku nos no por finalisá e proseso awor. “Pero e proseso di kuramentu i pordoná a kuminsá. Na mesun momento mi ta realisá ku e doló no a kita te ainda.”

Manera ta konosí 19 di desèmber último Promé Minister di Hulanda sr. Mark Rutte na nòmber dje pueblo hulandes a ofresé palabranan di diskulpa na pueblo di Kòrsou. te ainda no ta konosí si Willem-Alexander tambe lo pidi pordon.