‘Het gaat helemaal top!’

WILLEMSTAD.- Segun Su Mahestat Rei Willem-Alexander tur kos ta bayendo bon ku mama, su altesa real Prensès Beatrix. ‘’Het gaat helemaal top”, Willem-Alexander a bisa djaluna último na Hulanda. Djasabra último kas real a bin ku un komunikado di prensa tokante Prensès Beatrix. Segun e komunikado e prensès a tèst positivo riba Corona i a keda den isolashon na kas. Segun Willem-Alexander no tin niun problema. ‘E tabata un tiki fèrkout.’ Segun Beatrix esaki por tabata pa motibu di èrko na Kòrsou. Pa motibu di e fèrkout el a tèst. I segun e tèst e tabata positivo. ‘Pero e no ta falta nada’, Rei a duna di konosé.

Manera ta konosí   su altesa real Prensès Beatrix di Hulanda a bishitá Kòrsou entre 25 i 28 di novèmber. E bishita di trabou di prensès Beatrix tabata den kuadro di 25 aña di kolaborashon ku organisashonnan di naturalesa ku ta agrupá den Dutch Caribbean Nature Alliance (DCNA). Tambe Prensès Beatrix a bishitá diferente inisiativanan sosial durante su estadia na Kòrsou. Tambe el a papia ku diferente interesado riba e impakto di e pandemia di Corona. Su anfitrion gobernadó sra. George-Wout a organisá un resèpsi ku motibu di e konvenshon di DCNA.

Beatrix tin 83 aña awor. Djaluna 29 di novèmber el a yega Hulanda bèk. Durante su bishita na Kòrsou el a bisa ku el a haña dos vakuna kontra COVID-19 kaba i tambe un ‘booster shot’.

Rei Willem-Alexander djaluna último a gradisí tur hende den Reino Hulandes pa nan deseo di rekuperashon pa e eks-Reina.

Durante su bishita na Kòrsou Beatrix a topa ku diferente hende. Durante su bishita mayoria bia e no a bisti tapaboka. Su anfitrion gobernadó sra Lucille George-Wout durante e parti públiko di e bishita semper a bisti un máskara transparente kontra COVID-19. Te ainda no ta konosí si otro hende ku a topa ku prensès Beatrix a tèst positivo riba COVID-19 kaba.

Prensa hulandes ta skirbi ku den kuminsamentu di e bishita di Beatrix tabatin hopi atenshon pa hende rondó di su altesa real a bisti tapaboka i a mantené un distansia sosial di dos meter. Pero durante e bishita hopi bia hende no a mantené nan mes na e distansia di 2 meter, diferente hende no a bisti tapaboka tampoko ora nan a  topa ku Beatrix. Gobernador Lucille George-Wout hopi bia tabata e úniko persona ku a bista protekshon.