WILLEMSTAD.- Segun Peter van Leeuwen di organisashon di medio ambiente Schoon Milieu op Curaçao (SMOC) e tarea prinsipal di un gobièrnu ta pa protehá su siudadanonan. Pa e motibu gobièrnu tin ku duna informashon tokante futuro di refineria. Asina Van Leeuwen ta bisa den un entrevista ku EXTRA
Manera ta konosí te ainda gobièrnu, via un tim di negoshashon di Refineria di Kòrsou, ta den e proseso pa negoshá tokante un akuerdo ku Caribbean Petroleum Refinery por bira doño nobo di refineria. Un luna pasá a kuminsá ku negoshashon ku e meta pa yega na un akuerdo pa Caribbean Petroleum Refinery por manehá i operá fasilidatnan petrolero di Kòrsou.
SMOC ta pidi pa mas informashon relashoná ku e proseso aki. Nan ke sa kiko ta e kondishonnan ku Kòrsou tin pa un kandidato nobo. Den e kuadro aki e organisashon a manda un mail na gerensia di Refineria di Kòrsou i tambe ministerio di Salubridat, Medio Ambiente i Naturalesa (GMN). Den e mail ta skirbi ku SMOC pa mas ku 20 aña ta dispuesto pa yuda gobièrnu ku e konosementu i perisia ku nan tin. Pero awor nan ta pidi informashon pa pueblo di Kòrsou.
Van Leeuwen: ‘Te ainda nos no a haña kontesta riba esaki. I mi ta ferwagt ku gobièrnu ta bisa ku nan no ke duna informashon pa no hasi daño na e proseso di negoshashon. Pero gobièrnu no por lubidá ku nan promé tarea ta pa protehá nan siudadanonan kontra polushon di medio ambiente. I den e kuadro ta importante pa duna pueblo informashon i splika kiko ta e puntonan di salida den e negoshashon.’
Segun Van Leeuwen ‘despues di un periodo di mas ku 100 aña di polushon di medio ambiente dor di refineria, awor ta tempu pa e siudadano, ku ta biba bou di huma di refineria.’
Van Leeuwen ta enfatisá ku no ta intenshon di SMOC pa refineria sera su porta pa semper. Pa nan ta importante ku gobièrnu mantené normanan di medio ambiente moderno i tambe ta instalá sirkunstansia di labor ku ta bon pa salubridat di trahadónan i hende ku ta biba serka e refineria.