WILLEMSTAD - Tur kos ta mustra ku Fundashon pa Finansiamentu di Estudio (SSC) lo no por bai duna finansiamentu di estudio pa studiantenan ku ke bai studia den region e aña aki. Na komienso di e aña aki SSC a anunsiá kaba ku e redukshon di su supsidio ku 4 mion, ta pone ku e fundashon lo no por kumpli ku e petishonnan pa finansiamentu den region.

Asina ku SSC a tuma nota di e redukshon aki, el a informá Minister di Enseñansa Interino sr. Hensley Koeiman i su tim di konseheronan, di e konsekuensianan. E siman aki SSC a risibí un karta di e Minister den kua e ta informá ku gobièrnu lo subi e supsidio bèk ku 1,5 mion. E suma aki no ta sufisiente pa kumpli ku e petishon di aproksimadamente 240 studiante ku a yena un aplikashon pa risibí finansiamentu pa studia den region. Konsekuentemente SSC ta hañ’é ta ninga tur e petishonnan aki i ta bai rekomendá e studiantenan pa skohe un otro pais di estudio, esta Hulanda òf na Kòrsou mes. SSC a alertá e studiantenan for di komienso di aña ku si e supsidio no subi, esaki lo tabata e konsekuensia.

SSC ta lamentá e desaroyo aki profundamente, sigur si tene kuenta ku e resultadonan positivo di nos studiantenan den region, kaminda e kantidat di studiante ku ta kaba su estudio ku éksito i e kantidat ku lo regresá Kòrsou bèk ta muchu mas haltu. Ta bin aserka ku e debe di estudio ku e studiantenan aki ta keda kuné, ta muchu mas abou ku di esnan na Hulanda.

Mirando tur e bentahanan i e éksito ku tin aktualmente ku estudionan den region i e desapunto ku e desaroyo aki lo tin pa e studiantenan i nan mayornan, SSC a pone e problema aki na konosementu di e Minister nobo di Enseñansa sra R. Esprit di Gabinete Gilmar Pisas. SSC a pidi e Minister pa wak si realmente no por haña un solushon pa e problema aki ku a surgi awor ku no por finansiá studiamentu den region mas.

Mientrastantu ta importante pa tur studiante kuminsá buska un otro alternativa di estudio i informá SSC mas lihé posibel di e kambio aki pa evitá ku aki ratu nan ta kai lat pa inskripshon na e instituto di estudio òf pa por regla bibienda pa e studiante na Hulanda.