WILLEMSTAD.- Direktor di kompania di aviashon TUI, Fritz Joussen, ta spera ku TUI durante periodo di zomer di aña 2021 lo bula ku 80 porshento di e kantidat di buelonan ku normal. Esaki ta referí segun Joussen ku 80 porshento di turistanan lo bin Kòrsou, Aruba i Boneiru. Hopi di nan lo bin durante lunanan di yüni, yüli i ougùstùs. Segun e direktor di TUI den periodo di zomer 2021 mayoria di e restrikshon ku ta konta awor pa hulandesnan ku ke bishitá e islanan Karibense di Reino Hulandes, lo no ta konta mas den algun luna.
Direktor di TUI a bisa ku hopi hende na Hulanda tin un deseo grandi pa bula. Manera ta konosí hulandesnan no por bai afó for di luna pasá. Normalmente hopi hulandes ta bishitá e islanan Karibense di Reino Hulandes. Hopi di nan no por a hasi esaki ku e ticket ku nan a kumpra, pa motibu di restrikshon ku gobièrnu hulandes a instalá. Nan a haña ‘voucher’ i segun direktor Joussen chèns ta grandi ku hopi di nan lo usa e vouchernan durante e periodo di zomer.
Manera di konosé dia 16 di desèmber 2020 TUI a disidí pa para tur buelo di fakansi ku destinashon pa islanan di eks-Antia Hulandes. A skrap tur buelo di vakashon for di 16 di desèmber te ku mitar di luna di mart.
Dor di konseho negativo di gabinete Rutte pa biaha, e kompania a tuma e desishon di para buelonan di fakansi pa islanan di Antia.