WILLEMSTAD.- Visepresidente di Asosiashon pa Komersio i Industria (VBC) Reinald Curiel durante rueda di prensa djárason 2 di yüni a bisa ku ‘si bo ta wak Aruba, ku nan por a publiká ku nan tin un rekuperashon di 60 porshento di turismo, kompará ku aña pasá. Ta yora nos tin ku yora. Pasobra na Kòrsou no a sosedé nèt nèt nada pa stimulá nos turismo i pa por atraé turista.’ Curiel a splika ku turismo ta un pilá hopi importante pa nos pais. ‘Aktualmente ta e pilá mas importante ku tambe tin su tentakelnan ku ta bai diferente áreanan.’

Direktor di CHATA, ku ta e organisashon di hospitalidat i turismo na Kòrsou, Maria-Helena Seferina-Rojas a bisa durante rueda di prensa ku ‘CHATA ke duna lus riba situashon di sektor turístiko.’
El a papia tokante ‘efekto katastrofal’ riba sektor turístiko den e último periodo. Seferina-Rojas a papia tokante hotèlnan, pero tambe kompania di atrakshonnan, kompania ku ta hür outo, skol di sambuyadó i otro kompanianan ku ta partisipá den sektor turístiko. CHATA tin mas o ménos 200 kompania den su miembresia. ‘Situashon ta hopi grave. Nos mester tin un akshon rápido i konkreto pa por rekuperá di e pandemia di COVID-19, ku ta andando kaba mas ku un aña i mei.’
Segun Seferina-Rojas ‘mayoria di e kompanianan no por a pensa di sobrebibí e di dos lockdown. ‘Mas ku nunka nos ta mira ku e merkado ta determiná e demanda. Den merkado ta pidi pa un proseso di imigrashon fásil. Turista ku ta vakuná ta spera ku nan por drenta sin tèst òf sin ménos tèst por lo ménos.’ Seferina-Rojas a splika ku mas pais na Oropa, Merka i tambe paisnan den Karibe a adaptá nan kondishonnan pa asina atraé mas turista. ‘Pues e diferensia entre aña pasá i awor aki ta ku e kompetensia ta severo. Turistanan tin opshon atrobe i nan por skohe unda nan ke bai fakansi.’ E direktor di CHATA ta bisa ku na e momento ei Kòrsou i Boneiru ta haña e mesun kantidat di ‘boeking’. ‘Normalmente nos ta atraé hopi mas hulandes ku Boneiru.’ Tokante Aruba i St. Maarten el a bisa ku nan a logra rekuperá hopi mas lihé ku Kòrsou. Segun Seferina-Rojas pa e motibu ei Kòrsou tin ku kambia su maneho hopi drástiko.