WILLEMSTAD -- Wes a rechasá e demanda multimionario ku Sint Elisabeth Hospital (SEHOS) a entregá kontra Gobièrnu di Kòrsou. Den su sentensia, wes den huisio sumario a rechasá e eksigensia di SEHOS pa obligá gobièrnu ratifiká un debe di mas di 118 mion florin a base di un Memorandum ku a firma na sèptèmber 2013. Di debe aki Sehos a eksigí 44 mion florin mesora, di kua 18 mion florin den tres dia. Sehos ta interpretá e Memorandum komo un dokumentu ku ta enserá ku lo kubri tur gastu di e hospital aktual. Awor ku ta bai pasa pa un struktura nobo, mester atendé e punto aki, segun Sehos.

Wes no a konsiderá e puntonan di bista di SEHOS konvisente den e fase aki i a kondená SEHO pa paga gastunan di e huisio sumario. Esmas, Sehos a kuminsá un otro demanda den korte atministrativo pa loke e ta eksigí. Korte atministrativo no a disidí riba e demanda ei ainda. P'esei no tin lugá pa den un huisio sumario intervení den e otro proseso ku a kaba di kuminsá, segun wes ta bisa. Ta bin serka e pregunta ku si bai di akuerdo mes ku loke Sehos ta pidi i nan pèrdè e kaso atministrativo kon ta haña e sèn bèk di un hospital ku ta den problema finansiero serio, asina wes a remarká.