Ayera rekorido i simulashon di vakunashon

WILLEMSTAD. - Ayera un tim basta grandi di profeshonalnan di kuido, di tantu GGD i esnan ku ta bai vakuná e hendenan a haña un rekorido i alabes tabatin un simulashon ku a tuma lugá.

Tabata presente na e rekorido, Personal di GGD, Kuerpo di Bombero, Servisio di Ambulans i tambe Krus Kòrá ayera a hasi un bishita na SEHO ku ta e sentro di vakunashon i tambe tur esnan ku ta bai traha na e sentro di vakunashon na SEHOS.

Ta bai usa ántes Anna Paviljoen,  pa vakuna personanan di 65 aña di edat i ariba i kaminda ku tabata ántes Poli, lo bira e sentro di vakunashon pa pueblo en general.

Lo tin un bali kaminda ku einan e personanan ku ta bai vakuná ta registrá i despues ta guia nan pa e sala despues di a risibí nan vakuna. Akinan e persona ta keda un ratu pa evaluá si tur kos a bai bon ku e persona ku a risibí e vakuna.

Algun dia tras di lomba  Minister Presidente Sr. Eugene Rhuggenaath a pone riba su pagina di facebook ku el a hasi un rekorido na SEHOS, kamnda ku el a haña informashon tokante e proseso di vakunashon pa ku Covid-19 ku lo inisiá pronto. Despues ku SEHOS, komo institushon ku a sirbi komunidat di Kòrsou pa 165 aña, awor SEHOS lo hunga un ròl importante den maneho di e pandemia di Covid-19, asina Rhuggenaath a duna di konosé.

Bou di guia di sr. Danny Oleana ‘Operational Manager’ di e programa, a pasa kompleto dor di e proseso ku Minister i a laga Minister ku un sentido orguyo hopi grandi pa wak kon tur persona i instansia ta traha huntu p’asina sòru pa un proseso kana mas suave posibel. Tambe pa por guia nos hendenan ku empatia pa nan por tin un eksperensia plasentero.

Manera informashonnan ku a yega na redakshon di EXTRA ta indiká ku awe e vakunanan ta yega i ku den kurso di otro siman lo kuminsá ku e programa di vakunashon pa Kòrsou por drenta den un siguiente etapa di stabilidat i rekuperashon.

For di un otro profeshonal den e tim ku ta guia e proseso aki, EXTRA a komprondé ku Kòrsou a prepará bon i tin hopi hende kapas i ku hopi ekspertisio pa garantisá un proseso ku lo kana sin problema. Kòrsou ta bon prepará i e prerogativa ku tin ta pa garantisá ku e vakunanan ta bon salvaguardá.

Riba e kombinashon di foto por tuma nota di e bishita ku Promé Minister a hasi, trabounan tumando lugá i tambe kon ayera tabata ora ku tabatin un rekorido.