Den mei aki lo kuminsá papia ku distribuidornan di importansia vital pa Sehos

WILLEMSTAD.- A lanta un preokupashon serka kompanianan lokal despues di realisá ku hospital nobo ta práktikamente kla, pero nan no ta hañando niun negoshi di e hospital nobo. Elvis Thode direktor finansiero di Sint Elisabeth Hospital (SEHOS) a splika ku nan di Sehos no ta enkargá ku hospital nobo HNO. Sinembargo Sehos ta den estrecho kombersashon ku direktor di HNO sr. Martina pasobra Sehos ke hasi esfuerso pa distribuidornan ku nan ta traha kuné por sigui traha ku HNO tambe.

Resientemente parlamentario Giselle McWilliam (MAN) a manda un karta ku preguntanan na minister di Salubridat riba e tópiko aki. Despues di esei a sigui mas señal di preokupashon den komunidat. Manera indiká kaba e gerensia di Sehos no tin nada di bisa den e  hospital nobo. E gerensia di Sehos ta deseá pa e distribuidornan ku nan ta traha kuné tambe por haña un transishon suave meskos ku ta reglando transishon suave di empleadonan.

Sehos ke tende kiko ta e palabrashonnan ku HNO a hasi ku e distribuidornan lokal. Thode ta bisa ku segun el a komprondé, e gran mayoria di distribuidó di Sehos lo por ta distribuidó pa HNO. Den mei aki lo kuminsá papia ku distribuidornan di importansia vital pa Sehos. Lo splika nan kiko e proseso di transishon lo nifiká pa nan. Tin hopi distribuidó ku Sehos debe hopi plaka, kiko ta bai pasa ora HNO bira operashonal.

Kompensá Sehos

Na opinion di sr. Thode ta huntu mester buska solushon pa e problema di Sehos. Parti di e solushon pa Sehos su problemanan finansiero, segun gobièrnu, ta ku Sehos mester bende algun di su edifisionan. Thode no ta kere ku e kaso ta asina fásil. Sehos tin edifisionan bèrdat i na momentu ku mester a yuda gobièrnu semper e fundashon a hasi esei. El a duna komo ehèmpel ku e tereno un gobièrnu a traha Poli ta un tereno ku e fundashon Sehos a pasa pa gobièrnu pa un suma simbóliko di 1 florin. Riba loke ántes tabata Hamelbergweg Sehos tabatin algun edifisio e.o esun di mortuario i ‘prikcentrum’. Si wak e sumanan ku gobièrnu ta bai paga pa e edifisionan ei ta preis inkreibel abou. Di otro banda por mira ku gobièrnu a paga 18 mion florin pa Colon. Sehos no a haña un akuerdo asina. Ta ora pa gobièrnu kompensá Sehos pa e edifisionan ku e fundashon a yuda gobièrnu kuné.

Sehos a sakrifiká su edifisionan na preis abou pasobra tabatin palabrashon ku gobièrnu ku lo yuda solushoná e problema finansiero,  pero ki ora gobièrnu ta kuminsá? Gobièrnu a pone riba papel ku ta yuda Sehos solushoná su problemanan. E solushon ta den eksplotashon i no den bende edifisionan. E minister aktual no ke mira e MOU di 2013 komo posishon hurídiko, Sehos ke ta fleksibel pero nan tambe ke haña algu bek.