WILLEMSTAD.- Den un karta pa parlamento hulandes sekretario di estado Raymond Knops (Relashonnan di Reino) a duna un splikashon enkuanto e situashon rondó di proposishon di Lei di Reino COHO. Den su karta Knops ta skirbi ku despues di kombersashon ekstenso entre Hulanda, Aruba, Kòrsou i Sint Maarten na luna di yüli último, a yega na un akuerdo tokante e Lei di Konsenso di Reino COHO. Den Konseho di Minister di Reino di 3 di sèptèmber último a ratifiká e akuerdo aki. Komo ku no por dedusí e kambionan palabrá tokante supervishon finansiero direktamente for di e konseho anterior di Raad van State di Reino (RvSK), e paisnan a disidí konhuntamente pa presentá e parti ei di e lei di Reino un bia mas na RvSK pa medio di un NvW, Knops ta indiká.

Fin di sèptèmber RvSK a emití un konseho huntu ku e NvW aki, ku un asina yamá ‘dictum B’. Esaki ta nifiká ku e Konseho ta duna solamente un kantidat limitá di remarke. Basá riba e konseho aki a bolbe tene kombersashonnan ofisial intensivo i riba 2 di desèmber último a yega na un akuerdo ofisial riba e NvW. E mes dia ei mi a buska kontakto ku e promé ministernan di Aruba, Kòrsou i Sint Maarten, kaminda mi a puntra pa konfirmá e akuerdo gubernamental mas pronto posibel. Despues di konfirmashon, RMR lo no mester trata e proposishon di Lei di Reino di nobo, pero lo por present’é direktamente via di Rei na bo Kamer i e parlamentonan di e paisnan, di manera ku despues bo por trata e proposishon di e manera usual. Di e manera ei ta duna refleho na e proseso demokrátiko.

Knops: “Reakshonando riba mi mensahe di 2 di desèmber, e tres promé ministernan a konfirmá na mi ku riba término kòrtiku tomo di desishon lo a tuma lugá den e Konsehonan di Minister. Desde e momentu ei mi no a tende nada mas. Ta despues di un rekordatorio numa di mi parti djis promé ku e RMR, e tres promé ministernan a informá mi ku e akuerdo ku a yega na dje dos siman promé kaba bou di nos mandato, ainda no por keda ratifiká polítikamente. Esaki ta difísil pa komprondé den bista di e palabrashonnan anterior i ta preokupá mi hopi. Asina ei ta pèrdè realisashon di e Lei di Reino Aruba supervishon finansiero (RAft) tambe for di bista. Ta hopi importante ku despues di un aña di kooperashon intensivo ta pone e base legal palabrá bou di e kooperashon aki. For di prinsipio promoshon di realisashon di e lei di reino COHO di parti di e gobièrnunan tabata parti di e kondishonnan pa e sosten di likides. Meskos ku progreso den ehekushon di e pakete di pais, ta importante tambe pa dal e pasonan korekto den e trayekto di lei di reino i ku tin sufisiente progreso.’’

Manera ta konosí Knops ta duda den boluntat sinsero di e islanan pa kontinuá ku COHO. Pa e motibu ei e ke ‘reflekshoná riba e pregunta di i kon nos por sera e kooperashon aspirá fruktífero pa seis aña, teniendo na kuenta e palabrashonnan hasí anteriormente’.