‘El a bira un oportunidat pa deshogá nos mes atrobe’

WILLEMSTAD.- Ayera mèrdia a tuma lugá un reunion entre representantenan di Gobièrnu di Kòrsou i sektor di Farándula. E intenshon tabata ku Promé Minister, sr. Pisas asistí na e reunion pa por a skucha, informá i papia ku e sektor pa informá ku no por suavisá ainda.

Promé Minister, sr. Pisas a diskulpá su mes i tabata sr. Lesley Fer, Ronny Cornelis i representantenan dje departamentu hurídiko di Gobièrnu a interkambiá di pensamentu i duna splikashon na e grupo di persona di e sektor di Farándula ku tabata presente.

‘DEN E BEMBE’ a kombersá ku sr. Feco Gomes, presidente di AMAK i el a sali indiká ku nan ta desepshoná pa e resultado dje reunion. ‘El a bira un oportunidat pa deshogá nos mes atrobe. AMAK a bolbe entrega un karta ku algun konsiderashon i proposishon pa Gobièrnu evaluá. E sektor ke papia ku Min. Pres. mas pronto posibel’, asina Feco a indiká.

Ludwig Isabella, Dj Danger, konosido animadó di radio i promotor a indiká ku ‘No tin perspektiva’. ‘Mi ta lamentá ku mi mester a gasta gasoil pa bai e reunion. No tin nada konkreto, un gastamentu di tempu. E reunion tabata djis un kos pa bisa ku a sinta ku e sektor, pero no tin perspektiva.

‘DEN E BEMBE’ a kombersá ku sr. Lesley Fer i el a indiká ku ‘Mi ta komprondé nan desepshon. No ta ami ta sinti e dolor, ta nan. Nos a pidi un reunion ku e sektor pa Skucha nan, informá i papia ku nan pasó no por suavisá ainda’, asina sr. Fer a kuminsá splika.

‘ A duna un splikashon dikon e medida mester keda alargá i ku no tin otro opshon. Tanten ku e kontagio no baha i e kantidat di pashènt den ICU na CMC keda haltu no por otro’.

Mas aleu sr. Fer a konfirma di a risibi un karta di AMAK kaminda nan ta ventila nan dolor.

E departamentu hurídiko di Gobièrnu durante dje reunion a duna un splikashon dje ‘App’ ku lo bai wòrdu usa pa kontrolá na entrada di eventonan.

E situashon ta un di atenshon segun sr. Fer a splika i mester komprondé ku no por tuma otro desishon na e momentunan aki.

Finalmente manera ‘DEN E BEMBE’ a informá e petishon pa e sektor por reuní ku Minister Presidente, sr. Pisas ta keda na vigor i nan ta pendiente pa por risibí un invitashon di su parti.