Sektor priva ta para kompletu tras di koalishon nobo

WILLEMSTAD.- Un ratu pasá un delegashon basta amplio di personanan ku ta representá sektor priva di Kòrsou a reuní ku un delegashon di partidonan ku ta formando e próksimo gobièrnu di Kòrsou. Lider polítiko di partido Nashonal sra. Ruthmilda Larmonie-Cecilia huntu ku Charles Cooper (MFK) i otronan a reuní ku e delegashon di empresarionan di Kòrsou. Dean Rozier, te resientemente bosero di e Grupo 15, a splika ku despues di e kombersashon ku e delegashon di polítikonan nan por papia di trankilidat. E delegashon di sektor priva a duna benefisio di duda i sosten na e koalishon entrante.

Ta trata di un reunion ku a dura mas ku 1 ora. Pa e delegashon di empresarionan tabata importante pa tende direktamente di e partidonan ku ta formando e próksimo gobièrnu apesar ku a tuma nota di nan akuerdo di gobernashon i nan programa di gobernashon. Tur hende sa ku Kòrsou tabata pasando den momentunan difísil i riba esei a bini Covid, loke a hasié retonan ainda mas pisá.

Sektor priva den palabranan kla a splika ku nan ke kolaborá ku e gobièrnu nobo pa saka e pais aki dilanti atrobe. No mester pèrdè for di bista ku sektor priva ta representá 47.000 trahadó di e pais aki. Sektor priva a lesa ku e koalishon entrante ta papia di inklushon i nan ke komprobá te kon leu e polítikonan aki ta para tras di e palabranan ei.

Sektor privá a pidi e polítikonan pa por fabor skucha sektor privá promé ku tuma kualke medida. Naturalmente ta gobièrnu ta esun ku ta tuma tur desishon, solamente ta pidi pa skucha e sektor pa asina e medidanan por ta mas balansa posibel. Sektor privá te konvensí ku mester bini kambio pasobra no por keda hasi mesun kos ku ta hasiendo último dékadanan pasobra esei a demostrá kaba ku e no ta duna resultado positivo. Nan a keda kontentu di tende ku e koalishon nobo ta dispuesto na skucha e sektor. Ta duna e koalishon nobo benefisio di duda i asta esnan presente a duna e koalishon nobo sosten unánimemente.