WILLEMSTAD.- Na aña 1971 Kuerpo Polisial di Antia Hulandes a disidí riba petishon di gobièrnu, pa introdusí damanan den Kuerpo Polisial komo polisnan femenino.

Di algu mas ku 600 solisitante, a logra selektá 12 kandidato ku por a kuminsá nan estudio na Leusden, Hulanda. Motibu di esaki tabata, ku e infrastruktura e tempu ei no tabata adekuá na skol di polis lokal, pa akapará e damanan aki, ya ku tur kos tabata konsentrá solamente riba aspirantenan maskulino.

Riba 15 di novèmber 1971 e dosein di damanan aki a subi buelo di K.L.M. rumbo pa Hulanda pa sigui e estudio básiko di polis.

Den luna di mart di aña 1973, nan tur a regresá despues di a gradua di un estudio ku tabata konsistí di e parti teorétiko i práktiko.

I djaluna a selebrá 50 aña pasa ku e damanan aki a subi avion pa bira polis. Nan a rekordá e echo gradisiendo Dios i risibiendo bendishon ku un santu sakrifisio di misa na Katedral di Pietermaai. Durante di e selebrashon religioso a konta entre otro ku presensia di gobernadó sra. Lucille George-Wout.