WILLEMSTAD.- Den aña 2016 e Servisio di Limpiesa di Kòrsou (Selikor) a rekohé kasi 33 mil tòn di sushi normal di kas, i tambe un total di 2.071 tòn na sushi gròf di kas. Na sushi di kas e tabata 5.2 mil tòn mas ku e aña anterior, i na sushi gròf e tabata un 300 mil kilo mas di e aña anterior. Esei por komprondé for di un relato anual ku e kompania a emití. E relato ta bisa ku den 2016 Selikor a bishitá un 73.219 kas pa rekohé sushi, ku ta 2.200 mas ku e aña anterior. Di e kantidat di kasnan den 2016 el a rekohé 32.899 tòn di sushi.

Kompará ku e aña anterior por bisa ku na 2016 e kompania a konosé adelanto den e servisio ku e ta duna. E falta di kapasidat den trùk pa rekohé sushi den 2016 a ser kompensá pa gran parti dor di kompra di un kantidat di trùk nobo, ku por ser konsiderá komo un invershon. Dor di esaki e disponibilidat di trùknan a subi ku 9%. Mas aleu den e aña ei a bolbe traha ku skemanan dòbel pa por a kumpli ku e skema di rekohementu di sushi.

Sushi gròf

Den e aña dje relato aki Selikor a rekohé un total di 2.071 tòn di sushi gròf, ku ta e tipo di sushi ku no por ser poné den Kliko. Den esaki por pensa riba muebel, wasmashin etc. E tipo di sushi aki por a ser poné pa Selikor a pasa rekohé grátis konforme un skema anual ku e kompania ta publiká. E servisio aki tambe ta un servisio públiko ku ta ser duná na komunidat riba enkargo di gobièrnu.

Manera ta konosí, Selikor ta rekohé sushi den forma spesial serka pakus i tiendanan den sentro di siudat. Pero esaki ta pa motibu ku di akuerdo ku lei e negoshinan aki ta obligá di paga un rekargo spesial tambe. Den 2016 un biaha mas e departamento di Maneho di Sentro di Siudat i Barionan a sòru pa tene kayanan limpi. Sushi ku ta ser produsí dor di e 839 negoshinan a ser rekohé den e aria aki. Tambe a hasi trabounan di saniamentu diariamente.

Banda di bari ku e mashin spesial di bari, a hasi uso di limpiadó nan ku ta tene e kayanan smal i plenchinan etc. limpi tantu pa loke ta sushi gròf komo sushi ku ta bula riba kaya. Un aspekto importante tambe ta ku a dediká atenshon na e holó stinki ku sa tin den e kayanan smal aki.

Kayanan prinsipal i barionan tambe ta parti dje tarea di Selikor. Den e aña aki a reservá mas espasio i fondo riba presupuesto di gobièrnu pa limpiesa i mantenshon di kamindanan públiko i barionan. E aktividatnan di limpiesa riba kareteranan prinsipal a produsí un total di 946 tòn, miéntras ku e trabounan den barionan a produsí 729 tòn di sushi.