...Riba foto por mira direktor general di Selikor NV sr. Wesley Kook den kompania ku koleganan di Selikor i tambe sr. Sharlon Melfor, sekretario general di e Ministerio di Salú Medioambiente i Naturalesa ku alabes den representashon di Minister di Asuntunan General sr Gilmar Pisas ku ta enkargá ku e parti di Medio Ambiente i Naturalesa di e ministerio, dunando inisio na trabounan di limpiesa bario di Banda Bou...

Selikor ta konta ku koperashon di outomobilistanan

WILLEMSTAD. - Próksimamente Selikor lo sigui ku trabounan di limpiesa riba kareteranan prinsipal rònt Kòrsou i tambe den barionan di Banda Bou. E trabounan lo dura te mas o ménos fin di desèmber 2023.

Gobièrnu ta pone presupuesto disponibel hasiendo posibel ku Selikor por terminá ku e trabounan di limpiesa te ku fin di aña. Manera ta usual Selikor a plania i organisá pa e trabounan di limpiesa por tuma lugá.

Pa mayoria di e trabounan di limpiesa Selikor ta hasi uso di kontratista òf fundashonnan di bario. Den sentro di siudat i áreanan rondó di esaki tin algun ku Selikor su personal mes ta mantené limpi.

Pa luna di novèmber lo sigui ku e trabounan di limpiesa riba kareteranan prinsipal i den barionan di Zegu te ku Westpunt.

Selikor ta pidi un i tur pa duna espasio na e tim di limpiesa pa nan por hasi nan trabou di forma optimal. Despues ku e trabounan di limpiesa finalisá e apelashon ta pa yuda mantené, nos kareteranan prinsipal, bario i área rondó di kas limpi.

Kada un siudadano mester realisá e importansia i nesesidat pa yuda mantené barionan limpi. Esaki ta parti di kada un su responsabilidat síviko pa ku pais. Si kada un hasi esaki, e ora ei por garantisá un Kòrsou limpi, manera tur hende lo ta deseá.

Selikor ta konta ku un i tur su kolaborashon pa di e forma akí yuda mantené Kòrsou liber di shushi.

Finalmente Selikor ta konta riba koperashon di outomobilistanan pa tene kuenta ku trahadónan ku ta laborando kantu di kaminda i baha velosidat den áreanan den kua e trabounan ta tumando lugá.