WILLEMSTAD.- Selikor ta tuma e desishon ku no ta atendé mas ku e sistema di servisio pa Kloaka. Un disputa entre Selikor i Gobièrnu a yega ayera na un konflikto.

Selikor ta informá ku pendiente formalisashon di e kontrato ku gobièrnu pa mantenshon di e sistema di kloaka, entrante promé di mart 2021 Selikor lo posponé trabounan planiá te ku un próksimo aviso.

Ministerio di VVRP, den e kaso akí spesífikamente e departamento di Obranan Públiko, a bin ta traha pa algun tempu kaba pa yega na un Akuerdo di Nivel di Servisio nobo (SLA) ku Selikor pa hasi mantenshon preventivo i kurativo na sistemanan di kloaka riba nos isla. Debí ku e proseso akí ainda no a konkluí a yega na e punto na unda no ta finansieramente responsabel pa Selikor sigui brinda e servisio. Selikor ya a pone e ministerio en kuestion na altura di esaki i a indiká tambe ku lo no por sigui tuma petishonnan di públiko pa e servisio.

Klientenan ku haña problema ku nan kloaka ta verstòp por tuma kontakto ku departamento di Obranan Públiko na 433-4444.

Selikor ta pidi su diskulpa pa kualke inkonbeniensia ku esaki por trese