WILLEMSTAD.- Despues ku algun dia atras a konstatá kasonan di COVID-19 serka algun detenido, a lanta un tiki pániko na e sèlnan di polis na Barber.

Esaki debí ku no tabatin sigur kua detenido tabatin kontakto ku otro i tambe te kon leu e kontagio aki por a yega. E sintimentu di pániko aki a yega serka polisnan mes na Barber i tambe esnan ku ta transportá e prezunan aki.

EXTRA a komprondé ku a wanta ku uso di e sèlnan djis un ratu pa asina por a desinfektá. Despues di esei, tur kos a sigui normal i a sigui sera detenido na Barber. Na momentu di transportá kualke detenido ta hasi esaki tambe na e manera korekto kumpliendo ku e protokòl di higiena i asina purba evitá mas tantu posibel ku lo por bolbe ripití kontagio bou di detenidonan.

E detenidonan ku a keda kontagiá ainda ta den isolashon na e departamento di barak na Sentro di Detenshon i Korekshon Kòrsou te na momentu ku nan ta liber di e vírùs aki.