E estímulo mester sali for di e doño di trabou

WILLEMSTAD.- Dr. Jerry Semper ta di opinion ku estímulo pa vakunashon lo tin efekto positivo. E ta reakshoná riba notisia ku a bira konosí djaluna anochi ku un kompania na Aruba ta duna su trahadónan 300 dòler si nan vakuná. Ta trata di Wind Creek Aruba, ku ta doño di e hotèlnan Renaissance, diferente kasino i Starbucks. Trahadónan por kobra un bónus di 300 dòler òf 525 florin asina ku nan kaba di vakuná. E bónus aki ta bin komo un forma pa enkurashá tur e trahadónan di e hotèlnan den sentro di Oranjestad, pa por vakuná i asina evitá di por kontagiá ku vírus di Corona i evitá di por kontagiá e huéspetnan ei den tambe.
Dr. Semper ta konvensí ku estímulo asina lo tin komo konsekuensia ku mas hende ta bai vakuná. El a splika EXTRA ku ora gobièrnu a kuminsá ku sentro di vakunashon na Sambil ‘tabata mi plan pa tur hende ku vakuná na Sambil por haña deskuento den Sambil ora nan kaba. Pero pa e funshoná e estímulo mester sali for di e doño di trabou, supermerkado, ‘shopping mall’ etc. E no mester sali for di programa di vakunashon di gobièrnu.’ Asina dr. Jerry Semper ta splika, kende ta kordiná henter e proseso di vakunashon na Kòrsou.