WILLEMSTAD – Komo dos siman pasa tabata notisia ku Repúblika Bolivariano di Venezuela a partisipá ku huntu ku Ulanda nan por konfirmá reapertura gradualmente di frontera ku Venezuela. Na mes momentu Ministerio di Relashonnan Eksterior na Hulanda a informá EXTRA ku no tin akuerdo ku Venezuela tokante habrimentu lihé di frontera. Pues henter e situashon a keda un poko konfuso te ku dia 24 di desèmber na momentu ku Juan Gotopo, miembro di direktiva di Kámara di Komersio di La Vela de Coro a informá riba su kuenta di Twitter ku e apertura gradual di frontera entre Venezuela i Reino lo ta un realidat inisiando dia 4 di yanüari 2023. Esaki e ta konkluí despues di tuma nota ku e barku Krusero MS Amadea ku ta nabega bou di bandera di Bahamas i ku 600 pasahero abordo lo sali for di Isla Margarita dia 3 di yanüari i yega Boneiru dia 4 di yanüari 2023. EXTRA a verifiká e ruta aki riba portal di e barku krusero i tambe ku un agensia lokal ku a indiká ku bèrdat MS Amadea ta den sistema i ku e barku lo sali Venezuela rumbo pa Boneiru. Esaki sigur ta algu remarkabel ya ku for di dia ku a sera frontera ku Venezuela niun barku no a yega mas for di pais bisiña ofisialmente pa un di e tres islanan ABC. Despues di Boneiru MS Amadea lo sigui rumbo pa Aruba. EXTRA lo sigui buska reakshon riba e último desaroyo aki ku yegada di un krusero ku ta sali for di Venezuela pa Boneiru dunando un speransa pa hopi ku porfin por tin un apertura di frontera. Mester indiká si ku den pasado tabatin buelonan speshal entre Venezuela i entre otro Kòrsou. Pa loke ta MS Amadea tòg ta pekuliar komo ta trata di un krusero priva.