WILLEMSTAD - Ayera e dos selekshonnan  di RBI Curacao a hunga final di e Torneo Regional di RBI na DodgerTown, Vero Beach Florida. Tabata e selekshon Senior a ku a sa di gana pèrta di Puerto Rico 3-2 pa bai ku e título di kampion.  

Den divishon Junior, e selekshon di Kòrsou a kai vensí tambe ku skor di 3-2 den extra (8 ining) kedando den tereno kontra di e ekipo di Uganda i asina keda komo Sup Kampion.

Esaki ta di tres biaha ku Kòrsou ta kompetí den torneo regional di RBI i ta promé biaha ku ta logra un título di kampion.

Senior awor a gana e derechi pa bai kompetí den e Serie Mundial di RBI na Minnesota di 5 pa 10 di ougùstùs próksimo. Esaki lo ta e di 26 edishon di Serie Mundial di RBI i e organisashon di Liga Grandi, Minnesota Twins lo ta anfitrion di e torneo final aki. Weganan mes lo tuma lugá na Universidat di Minnesota.

Ámbos selekshon lo regresá Kòrsou mayan anochi riba buelo di American Airlines (Buelo 977) ku ta sali Miami 5:47 i yega aki na Hato 8:48.

RBI Curaçao ta deseá tur e selekshonnan di Little League ku ta of ta bai kompetí den torneonan regional tur klase di éksito tambe. Al final ta nòmber di Kòrsou tin ku keda resoná.

Niun di esaki lo no tabata posibel sin e sosten di e spònsernan prinsipal Maduro & Curiel’s Bank i tambe Curaçao Baseball Week i KNBSB ku a hasi e kampionato regular di RBI posibel.

RBI Curaçao ta kai bou di ouspisio di Curacao Baseball Development Foundation i den koperashon estrecho ku Fundashon pa Nan ta organisá e torneo aki kaba pa tres aña kaba.