WILLEMSTAD.- E señora asesiná na Seru Machu siman pasá, a yama Centrale Post na tres okashon sin ku a duna muchu seriedat na su yamadanan. Pa Mando polisial e fayo ta sintá na Centrale Post i ta p'esei ta einan a tuma medida mesora. A base di e datonan ku tin aworakí ta sospechá ku deskonosí (nan) a mata e señora den oranan di mardugá entre 5'or pa 6'or. Ta konsiderá e kaso komo unu masha serio.

EXTRA a informá ku den e kaso aki a suspendé dos miembro di Kuerpo di Polis ku ta traha na Centrale Post. Por sierto ku ta trata di funshonarionan ku ántes tabata traha na un otro servisio i awor a bira polis. Mando di polis mes no kier duna masha informashon riba e kaso aki komo ku e ta den investigashon profundo. Mas importante ta pa evitá ripitishon komo ku e kaso lo afektá imágen di e Kuerpo.

Pero EXTRA a komprondé ku tin un grupo di kolega kla pará pa sostené e dos koleganan ku a keda mandá kas. Manera nan a bisa EXTRA, si a manda e dosnan ei kas, kiko lo hasi ku esnan di patruya ku a bai e kas.

Pero nan ta bai mas leu ainda, e kulpa ta parti di mando di polis tambe debí na un falta enorme di trahadó pa sentral di polis i no ta tumando e medidanan pa remediá e situashon ei. E grupo di polis aki ku a aserká EXTRA a bisa ku esaki ta konsekuensianan di pone polisnan traha overtaim tras di otro i pa kolmo na momentu di e krímen parse no tabatin un polis na warda den sentral di polis ku por reforsá e koleganan ku ta mas bien “burger”.

Segun nos informashonnan, e patruya ku a bai e kas a informá sentral ku nan a pita i niun hende no a sali i kas tabata skur. Pero e kas mester ta skur ya ku e malechornan a kita koriente na e kas.

E investigashon ta bai mas leu ku loke hopi ta kere i asta segun EXTRA su fuentenan, tin un grupo di polis ta bai aserká nan sindikato pa sali na nan defensa.