WILLEMSTAD.- Señora di   Edmar Clemencia akusá di ta esun ku a paga  i duna Remyson Martina òrdu pa likidá Ulrich de Pablo dia 7 di a aprel aña pasá na Weto, a keda detené  despues ku el a testiguá den e kaso aki.  Durante tratamentu di e kaso ayera den pro forma, de Meeza a bisa ku e ta hura na Dios ku e lo deklará e bèrdat.

Hues na vários okashon a atvertié ku si e kometé perhurio, pues gaña bou di  huramentu, e por keda detené i ku esaki tin un máksimo kastigu di 6 aña.

Hues ayera a bisa, ku de Meeza  a duna vários deklarashon inkriminante kontra di Clemencia.

El a firma tur e  deklarashonnan  i a bisa ku el a papia bèrdat.

El a deklará for di 11 di mart  aña pasá te ku 7 di aprel konsientemente.

Ayera durante tratamentu di e kaso, de Meeza a ninga delaster un kos ku el  bisa i a splika ku ta polisnan ta gaña.

De Meeza a bisa na polis entre otro ku Army ta un ‘gang’ i ku nan ta drai den sírkulo kriminal.

Tur e muhénan di e hòmbernan di Army mester keda den kas i no mag bai niun kaminda, miéntras e hòmbernan  ta sinta bou di palu.

Relashoná ku e deklarashonnan aki  ku hues a revelá, ku de Meeza a bisa ku polisnan ta gaña i ku nunka el a bisa asina.

Ayera el a bisa mas aleu ku ta polisnan a bisa ku Army ta un ‘gang’ i e na su turno a kontestánan ku Army ta un famia.

Tambe el a bisa ku e no por a bisa ku ta Chino a kometé e akto pa motibu ku Chino no ta kapas di hasi e kosnan ei.

Hues a sigui relatá ku de Meeza a deklará na polis  ku el a wak Eto ku un arma fo’i 2015 na momento ku e tabata labando outo.

E arma tabata un “glock” i tabata riba banki. Na novèmber 2017 Eto lo a bai afó i a keda un aña i dos luna. Dia ku el a bini bèk el a bolbe mira Eto ku un arma. Riba esaki tambe de Meeza a bisa ayera ku e no a papia e kos ei niun ratu so i tur kos polis ta gañando.

El a splika ku polisnan a bis’é ku ta un arma 9 milimeter Eto tin, di kual el a bisa nan ku e no sa di nada.

Hues na su turno a bisa de Meeza ku niun momento so e no a mira eseinan skibí den e dosié.

Hues a bisa De Meeza ku e ta keda straño ku kon e ta ninga tur kos, miéntras ku el a firma tur su deklarashonnan den e dosié i asta a bisa ku el a lesa promé ku el a firma.

Martina a duna di konosé ku e no sa nada di e kaso ei i ku e ta será kompletamente pòrnada. Ta aksidente el a haña  otro kaminda i p’esei el a keda heridá.

Clemencia tambe a bisa ku fiskal sa muchu bon ku tin hopi korupshon den e Kuerpo Polisial Kòrsou i kon nan ta manipulá deklarashonnan, ku ta kos ku ta pasa na vários okashon. E kaso a keda posponé pa dia 12 di yüni, kaminda pa warda rapòrt di DNA di ámbos akusado. Na final de Meeza a keda detené pa no papia e bèrdat na opinion di Ministerio Públiko.