WILLEMSTAD.- Un ratu pasa wes a dikta sentensia den e kaso "Dubnium", ku a bira konosí komo kaso "Mondkapjes". Ta trata di un investigashon na kompra di 365.853 florin na kos pa tapa boka dor di BZV na aña 2012. A hasi pedido, pero nunka no a entregá e merkansia. Segun Ministerio públiko (OM), esaki ta un kaso kaminda deliberadamente por papia di labamentu di plaka.

E veredikto ta lo siguiente,  e akusado G.H.J.B. (Kòrsou, 1971) a hana kastigu di 8 luna prison. E demanda di OM tabata 15 luna prison. E akusado A.J.J.S. (Kòrsou, 1963) a hana kastigu di 20 luna prison. E demanda di OM tabata 34 luna prison. A.A.M. (Kòrsou, 1971) a hana libertat konforme demanda di OM.  E akusado J.V.A.C. (Kòrsou, 1973) a hana un kastigu di 20 luna prison i 5 aña e no mag ehersé e funshon komo minister. E demanda di OM kontra sra. Constansia tabata 34 luna prison i prohibishon pa traha komo minister pa un periodo di 5 aña.