PHILIPSBURG.- Korte di promé instansia ayera a sentensiá un wardadó di prezu pa e echo ku el a pasa 122 gram di mariwana den e instituto di detenshon House of Detention na Point Blanche i tambe pa abusu di su funshon. E wardadó di prezu X.R. a keda sentensiá na un kastigu di 120 ora di trabou pa komunidat i 6 luna kondishonal. Dado kaso e servisio na komunidat no ser kompletá na satisfakshon, anto esei lo resultá den un periodo di detenshon di 60 dia.

Tambe e sentensia tin un un periodo di prueba di 3 aña mará na dje. E echo ku un wardadó di prezu ta falta ku lei dje forma aki, ta manda un mal señal na komunidat i mas ainda na esnan ku ta será ku el a hura pa e vigilá tur dia komo parti di su trabou. E tipo di aktitutnan aki no solamente ta mina e outoridat di otro bewakernan den prizòn ku ta traha duru i ta keda denter di loke lei ta permití, pero tambe henter e sistema di hustisia den prizòn i e konfiansa ku komunidat ta depositá den su persona.