Motibu ku polisnan a bai riba skèrpi

WILLEMSTAD. - Tin hopi kos papiá di e tiramentu fatal ku a tuma lugá djadumingu dia 9 di mei último. EXTRA no ta bai drenta den tur e rumornan, pa motibu ku e investigashon andando lo mester determiná kiko eksaktamente a sosodé.

Konforme informashon for di den seno polisial, t’asina ku sentral a manda un patruya ku urgensia pa un kompleho di apartamentu den e área di Corriweg, pa motibu ku lo tin un problema saliendo for di man i asta tin menasa di morto.

Konforme e relato ofisial di polis ta indiká ku, ‘Sentral di Polis a dirigí un unidat polisial na un kompleho di apartamento riba Corriweg pa un problema entre algun persona. Na momentu ku polis a yega na e apartamento, habitante di e apartamento a indiká na polis ku e tabatin problema ku un hòmber ku a menas’é.’

Segun informashon verídiko ta indiká ku e momentu ku Sentral a tabata tumando e keho, nan por a tende hopi zundramentu i ku menasanan tabata kai pisá. Esaki ta registrá tambe den e sistema di kòmpiuter ‘actpol’ di polis.

Manera menshoná e echo ku e informe ku Sentral ta duna su unidat, ta pone ku e polisnan ta bai prepará pa e situashon ku lo ta presente e momentu ei, den e kaso aki un problema serio ku menasa di morto. Pues e unidat ya ta riba skèrpi pa kualke situashon ku presentá.

Kiko eksaktamente a sosodé pa e polis a lòs algun tiru dirigí ku a alkansá e víktima fatalmente na su kabes, no ta konosí ainda i ta investigashon mester determiná esei.

Koleganan a splika EXTRA ku niun polis ta sali kas pa tira niun hende mata. Pues algu mester a sosodé ku a pone ku e polis a saka su arma i tira ku e resultado ya konosí.

Mientrastantu a identifiká e persona komo Wilmer Alfonso Nieto Nieto nasé na Venezuela, 7 novèmber 1993, esta ku na novèmber benidero e lo a kumpli 28 aña di edat.

Investigashon lo mester determiná kiko a okurí ku e konsekuensia fatal.