WILLEMSTAD.- Sentral Sindikato SSK ta vigilá hopi skèrpi un dunadó di trabou ku ayera a saka un komunikado kaminda ta eksigí su trahadónan pa vakuná i si esaki no sosodé, nan lo keda retirá.

Den deklarashon pa EXTRA presidente di SSK, sr. Edward Sint Jacobs a bisa ku e dunadó di trabou mester tene kuenta ku algun punto: esta ku na Hulanda, Union Oropeo a bin ku un resolushon den luna di yanüari, kaminda nan ta bisa bon kla ku e vakunashon no mester tin deskriminashon i tampoko obligatorio.

Korte na Oropa Oksidental a duna konseho si ta nesesario e gobièrnu di e pais por hasi vakunashon obligatorio pa su siudadanonan pa garantisá pa tin mas trankilidat den e pais i ku no tin mas kontagio. Pero naturalmente esaki tin di kana su kaminda den e pais i e mester bira un lei. Pues na Kòrsou te na e momentu aki no tin un lei, ni gobièrnu i ningun hende por obligá un siudadano pe vakuná.

SSK ta kere ku loke e dunadónan di trabou ta hasiendo òf pone riba mesa pa trahadó bai vakuná, sino e no ta forma parti mas komo trahadó dje organisashon, esaki ta kompletamente inkorekto. E vakuna no ta obligatorio i kada hende ta sinti pa tum’é si òf no.

Di aya banda mester mustra hendenan riba nan responsabilidat pa nan no keda kontagiá i hiba e empresa i pais den mas problema.

E asuntu di PCR tèst no sa kuantu tempu esaki ta dura, i lo tin di keda tèst konstantemente, kual ta nifiká ku e hende mester tin sèn konstante pa keda invertí pa mustra su doño di trabou ku e ta bon i liber dje malesa.

E malesa aki niun hende a pidié. E no mester bira inhumano i hasi komo si fuera e trahadó no por bira malu i ta oblig’é pe hasi un tèst òf oblig’é pa vakuná pa e ta salú henter aña pasobra e mester ta na trabou.

SSK ta kere ku ta bon pa tur hende karga nan responsabilidat dor di mantené nan mes na tur regla vigente pa evitá di keda kontagiá i bira malu. I tambe SSK ta sostené i promové pa tur ku ke vakuná pa bai hasi esaki mas lihé posibel, pero obligá hende pa vakuná, i si e no hasié, e no ta forma parti dje kompania, e no ta korekto.

Segun ILO no tin ningun kaminda ku ta para skirbi ku por obligá un persona pa hasi algu fuera di su boluntat pa vakuná, segun Sint Jacobs.

Komo sindikato ta keda wak e situashon aki ku wowo di falki, pasobra e sentral sindikal sa ku den sierto empresa no tin representashon sindikal, pero p’esei tin SOAW kaminda e trahadó por akudí na dje pa duna nan preokupashon i pensamentunan.

Sr. Sint Jacobs a bisa di ta spera ku gobièrnu ta tuma nota di e kos aki pe no bira “free for all”, i sali for di man. Pasobra ora un empresa kuminsá lo haña mas ku ke hasi meskos kuné. SSK ta kere ku lo tin dunadó di trabou ku ta sòru pa nan trahadó ta den bon estado i esfera di trabou, pero mester keda wak ku wowo di falki pasobra tin dunadó di trabou ku ta di mala fe i ta hasi mal uso di oportunidatnan asina aki ku presentá, sr. Sint Jacobs a terminá bisando.

(Foto facebook)