WILLEMSTAD.-Sentralnan sindikal a reuní na Waaigat awe mainta huntu ku vários siudadano, speshalmente penshonadonan, ku e intenshon di tene un marcha di protesta pa finalmente topa ku sekretario di estado Raymond Knops i entreg’é un karta. E sentralnan sindikal ke splika sr. Knops e loke ta bibando bou di e pueblo aki.

No tin ningun palabrashon ku Knops, pero si lo trata na entreg’é un karta i si ta posibel asta papia kuné un ratu den kua lo mustra kon difísil e situashon ta na Kòrsou i sinembargo Ulanda ta keda pone preshon pa gobièrnu di Kòrsou tuma mas medida kontra di pueblo. Esei ta hasi e bida ainda mas difísil. Ayera nochi e dirigente sindikal Sille di BTG a bisa ku nan no ke papia ku Knops ya ku e ta arogante, sinembargo awe mainta e dirigente Calmes d CGTC ta bisa ku nan ke entrega karta i si por papia ku e sekretario di estado.

E dirigentenan sindikal no kier a duna muchu detaye di ki ruta nan ta bai kana pa asina evitá ku outoridatnan ta stroba nan di move. Calmes a bisa EXTRA ku esaki ta un manifestashon pasífiko kaminda ke mustra e doló di pueblo. Mas detaye den edishon di EXTRA.