WILLEMSTAD.- Sentralnan sindikal ta deseá den e reunion semanal tripartit ku gobièrnu i gremio komersial ku ta tuma lugá mañan pa haña mas informashon di e lei “normering top inkomens” ku resientemente a bai parlamento. Asina sigur 2 sentral sindikal ta konfirmá.

E proposishon di lei aki ta enserá no solamente ku ta pone un plafòn pa salario di direktornan di kompanianan di gobièrnu, fundashonnan di gobièrnu, fundashonnan supsidiá pa gobièrnu i “zelfstandige bestuursorganen” pero alabes ku ta kòrta den salario/kondishon laboral di e trahadónan ku 12,5 porshento. Prinsipalmente riba e kòrtamentu ku 12,5 porshento aki e sentralnan sindikal tin problema.

Un lider sindikal a asta bisa ku no ta bai aseptá bou di niun sirkunstansia ku ta kòrta den salario di trahadónan, djis pa asina por kumpli ku palabrashon ku Hulanda. Esaki ta di mas, e ta bisa indikando ku ta deseabel pa ekspertonan bin splika den e plataforma ta kiko eksaktamente ke logra ku e lei aki.

Segun e sindikatonan trahadónan ta sufriendo hopi kaba di e krísis okashoná pa covid-19 ku a kousa kremp ekonómiko grandi. Di otro banda preisnan di produkto a subi barbaramente i no ta tende nada ku gobièrnu ta hasi pa mitigá esaki.

Tin hopi trahadó ku durante e pandemia a pèrdè 20 porshento òf mas di nan salario i te ku awe no a rekuperá esaki. Awor gobièrnu ke sigui kòrta den kompanianan kaminda e sèn aki lo no bin den kaha di gobièrnu tòg, di akuerdo ku e sentralnan sindikal.

Ta for di 2018 e sentralnan sindikal ta bisa ku nan a indiká na gobièrnu pa kuminsá demostrá konkretamente kiko ta hasiendo pa baha otro tipo di gastunan i subi entrada di gobièrnu , alsa efisiensia èts., èts. pero te ainda no ta tende nada.

E tres sentralnan sindikal ku ta representá den e tripartit ta CGTC, SSK i SSS. Gremio komersial ta representá VBC. Kámara di Komersio bou di aktual gabinete Pisas no ta forma parti mas den e plataforma tripartit.