WILLEMSTAD.- Ta bai muda e sentro di bakunashon na Ana Paviljoen di Fundashon St. Elisabeth pa un lokalidat nobo. Esaki pa asina krea mas espasio pa trata pashènt infektá ku Covid-19.

Informashon ku EXTRA ta disponé di dje ta indiká ku e sentro di bakunashon ubiká aktualmente na Ana Paviljoen ta bai pa Sambil. E sentro aki tabata spesialmente pa hendenan ku tin problema ku mobilidat. A krea un espasio amplio pa nan por asta drenta den ròlstul i asina tuma  e bakuna.

Pero mirando ku tin un oumento drástiko den kasonan di hende malu ku Covid-19 mester krea mas espasio pa por ubiká pashènt malu. Curaçao Medical Center a informá djadumingu ku a kombertí e “recovery” room den un sala pa trata pashèntnan ku Covid-19 i asina amplia e kapasidat di kama te na 148.

Sinembargo ta premirá ku e kantidat di pashènt pronto lo surpasá e kapasidat aki tambe i pa e motibu aki ta bai muda e sentro di bakunashon na Ana Paviljoen pa Sambil i asina usa e ala aki na Fundashon St. Elisabeth pa pone mas kama pa pashèntnan ku ta malu.